sinon mein anal-haq ki chubhan dekh raha hun

sīnoñ meñ anal-haq kī chubhan dekh rahā huuñ

ik silsila-e-dār-o-rasan dekh rahā huuñ

phir aa.ī na ho shāmat-e-a.amāl kisī kī

phir vaqt ke māthe pe shikan dekh rahā huuñ

thoḌī sī bhī duniyā meñ sharāfat nahīñ baaqī

muddat se zamāne kā chalan dekh rahā huuñ

rahne do ye sab jhūTī mohabbat ke tamāshe

kis ko hai yahāñ kis kī lagan dekh rahā huuñ

pardā nahīñ duniyā meñ kisī ko bhī kisī kī

har shaḳhs ko apne hī magan dekh rahā huuñ

ik aag lagā dī mirī rangīnī-e-dil ne

maiñ dāġh-e-mohabbat kī jalan dekh rahā huuñ

taqrīr ke andāz tumheñ 'ḳhizr' mubārak

kis samt ko hai rū-e-suḳhan dekh rahā huuñ

sinon mein anal-haq ki chubhan dekh raha hun

ek silsila-e-dar-o-rasan dekh raha hun

phir aai na ho shamat-e-amal kisi ki

phir waqt ke mathe pe shikan dekh raha hun

thoDi si bhi duniya mein sharafat nahin baqi

muddat se zamane ka chalan dekh raha hun

rahne do ye sab jhuTi mohabbat ke tamashe

kis ko hai yahan kis ki lagan dekh raha hun

parda nahin duniya mein kisi ko bhi kisi ki

har shaKHs ko apne hi magan dekh raha hun

ek aag laga di meri rangini-e-dil ne

main dagh-e-mohabbat ki jalan dekh raha hun

taqrir ke andaz tumhein 'KHizr' mubarak

kis samt ko hai ru-e-suKHan dekh raha hun