sikhaya aql ne barson hamein ilm-o-hunar sab kuchh

sikhāyā aql ne barsoñ hameñ ilm-o-hunar sab kuchh

jo sochā to junūñ hī thā junūñ se beshtar sab kuchh

agar ik tū nahīñ to mere qabze meñ nahīñ kuchh bhī

agar tū hai to hai pokhrāj aur la.al aur guhar sab kuchh

nazar aaya hameñ aslī Thikānā mudda.ā aslī

jab āñkheñ band kar liiñ nek aur bad dekh kar sab kuchh

mirā sar phoḌnā ronā taḌapnā ġhash pe ġhash aanā

batā denā zabānī bhī unheñ ai nāma-bar sab kuchh

mohabbat hai to phir sabr-o-sukūñ hosh-o-ḳhirad kyā haiñ

luTā.e jā tū is maidāñ meñ ai sāhib-nazar sab kuchh

huā jo kuchh thā mere paas nazr-e-ḳhāna-vīrānī

dil-e-mohkam dimāġh-e-ālā-tar sangīñ jigar sab kuchh

matā-e-ranj-o-ġham ganjīna-hā-e-hasrat-o-hirmāñ

mohabbat meñ bhalā kyā kuchh nahīñ hai mere ghar sab kuchh

matā-e-husn se ik zarra vo 'nāyāb' agar de de

uThā duuñ shash-jihat na āsmāñ shams-o-qamar sab kuchh

sikhaya aql ne barson hamein ilm-o-hunar sab kuchh

jo socha to junun hi tha junun se beshtar sab kuchh

agar ek tu nahin to mere qabze mein nahin kuchh bhi

agar tu hai to hai pokhraj aur lal aur guhar sab kuchh

nazar aaya hamein asli Thikana muddaa asli

jab aankhen band kar lin nek aur bad dekh kar sab kuchh

mera sar phoDna rona taDapna ghash pe ghash aana

bata dena zabani bhi unhen ai nama-bar sab kuchh

mohabbat hai to phir sabr-o-sukun hosh-o-KHirad kya hain

luTae ja tu is maidan mein ai sahib-nazar sab kuchh

hua jo kuchh tha mere pas nazr-e-KHana-virani

dil-e-mohkam dimagh-e-ala-tar sangin jigar sab kuchh

mata-e-ranj-o-gham ganjina-ha-e-hasrat-o-hirman

mohabbat mein bhala kya kuchh nahin hai mere ghar sab kuchh

mata-e-husn se ek zarra wo 'nayab' agar de de

uTha dun shash-jihat na aasman shams-o-qamar sab kuchh