silsila zist ka hai gardish-e-ayyam ke sath

silsila ziist kā hai gardish-e-ayyām ke saath

kyā ta'ajjub jo basar hotī hai ālām ke saath

duur manzil huī jaatī hai har ik gaam ke saath

maiñ baḌhe jaatā huuñ phir bhī dil-e-nā-kām ke saath

dil mirā uljhā huā hai kisī gulfām ke saath

mere gulshan meñ bahār aa.ī magar daam ke saath

ziist meñ saarā tasalsul hai usī se qaa.em

ik nayā hotā hai āġhāz har anjām ke saath

ālam-e-yās meñ kyā jāniye kyā kar baiThe

Thahro kuchh der umīdo dil-e-nākām ke saath

'ishq meñ hotā hai yuuñ dil se tasādum dil kā

jis tarah jaam khanaktā hai koī jaam ke saath

aap ke pyaar ke ehsān bahut haiñ ham par

ranj bhī ham ne uThā.e baḌe ārām ke saath

mujh se kyā pūchhiye is baat kā matlab un se

naam jo aap kā lete haiñ mire naam ke saath

farsh ko 'arsh se ai dost bhalā kyā nisbat

'arsh aur us kā taqābul ho tire baam ke saath

is tarah zāt-e-'amar' se hai baqā vābasta

jis tarah merā taḳhallus hai mire naam ke saath

silsila zist ka hai gardish-e-ayyam ke sath

kya ta'ajjub jo basar hoti hai aalam ke sath

dur manzil hui jati hai har ek gam ke sath

main baDhe jata hun phir bhi dil-e-na-kaam ke sath

dil mera uljha hua hai kisi gulfam ke sath

mere gulshan mein bahaar aai magar dam ke sath

zist mein sara tasalsul hai usi se qaem

ek naya hota hai aaghaz har anjam ke sath

aalam-e-yas mein kya jaaniye kya kar baiThe

Thahro kuchh der umido dil-e-nakaam ke sath

'ishq mein hota hai yun dil se tasadum dil ka

jis tarah jam khanakta hai koi jam ke sath

aap ke pyar ke ehsan bahut hain hum par

ranj bhi hum ne uThae baDe aaram ke sath

mujh se kya puchhiye is baat ka matlab un se

nam jo aap ka lete hain mere nam ke sath

farsh ko 'arsh se ai dost bhala kya nisbat

'arsh aur us ka taqabul ho tere baam ke sath

is tarah zat-e-'amar' se hai baqa wabasta

jis tarah mera taKHallus hai mere nam ke sath