silsile ye kaise hain TuT kar nahin milte

silsile ye kaise haiñ TuuT kar nahīñ milte

jo bichhaḌ ga.e lamhe umr-bhar nahīñ milte

shor karte rahte haiñ jism-o-jāñ ke sannāTe

jab tavīl rāhoñ meñ ham-safar nahīñ milte

dhuup kī tamāzat se jo bachāo kar paate

sūrajoñ ke shahroñ meñ vo shajar nahīñ milte

chāhatoñ bhare kamre dil khule khulā āñgan

ab to DhūñDne par bhī aise ghar nahīñ milte

sab ne har zarūrat se kar rakhā hai samjhautā

log milte rahte haiñ dil magar nahīñ milte

vaqt ne to bastī kī shakl hī badal dī hai

jin pe raunaqeñ thiiñ vo bām-o-dar nahīñ milte

apne naf-o-nuqsāñ kā sab hisāb rakhte haiñ

ham se milne vaale bhī be-ḳhabar nahīñ milte

in dinoñ 'ḳhalish' aksar manzaroñ ke vo tevar

ajnabī dayāroñ kī ḳhaak par nahīñ milte

silsile ye kaise hain TuT kar nahin milte

jo bichhaD gae lamhe umr-bhar nahin milte

shor karte rahte hain jism-o-jaan ke sannaTe

jab tawil rahon mein ham-safar nahin milte

dhup ki tamazat se jo bachao kar pate

surajon ke shahron mein wo shajar nahin milte

chahaton bhare kamre dil khule khula aangan

ab to DhunDne par bhi aise ghar nahin milte

sab ne har zarurat se kar rakha hai samjhauta

log milte rahte hain dil magar nahin milte

waqt ne to basti ki shakl hi badal di hai

jin pe raunaqen thin wo baam-o-dar nahin milte

apne naf-o-nuqsan ka sab hisab rakhte hain

hum se milne wale bhi be-KHabar nahin milte

in dinon 'KHalish' aksar manzaron ke wo tewar

ajnabi dayaron ki KHak par nahin milte