simaTti sham agar dard ko jagaegi

simaTtī shaam agar dard ko jagā.egī

to sub.h nauha-e-mātūb gungunā.egī

maiñ hañs paḌūñgā to phir kasmasā uThegī fazā

havā-e-tund mirī lau jo gudgudā.egī

numū meñ mauj banegī namāzat-e-fardā

ridā-e-tīrgī jitne qadam baḌhā.egī

zamīn gā.egī aam aur jāmunoñ ke giit

barastī badlī vo sur-tāl āzmā.egī

jahāñ pe chāñd zamīñ se lipaT ke mahkegā

nashe meñ chāñdnī giit apne gungunā.egī

zamīñ sitāre falak ek hoñge gardish meñ

ruteñ vo aisī agar apne saath lā.egī

hazār buad o tafā.ut ke bāvajūd 'hanīf'

vahāñ bhī mujh se milegī jahāñ vo jā.egī

simaTti sham agar dard ko jagaegi

to subh nauha-e-matub gungunaegi

main hans paDunga to phir kasmasa uThegi faza

hawa-e-tund meri lau jo gudgudaegi

numu mein mauj banegi namazat-e-farda

rida-e-tirgi jitne qadam baDhaegi

zamin gaegi aam aur jamunon ke git

barasti badli wo sur-tal aazmaegi

jahan pe chand zamin se lipaT ke mahkega

nashe mein chandni git apne gungunaegi

zamin sitare falak ek honge gardish mein

ruten wo aisi agar apne sath laegi

hazar buad o tafaut ke bawajud 'hanif'

wahan bhi mujh se milegi jahan wo jaegi