simTun to sifr sa lagun failun to ek jahan hun main

simTūñ to sifr sā lagūñ failūñ to ik jahāñ huuñ maiñ

jitnī ki ye zamīn hai utnā hī āsmāñ huuñ maiñ

mere hī dam-qadam se haiñ qaa.em ye naġhma-ḳhvāniyāñ

gulzār-e-hast-e-būd kā tūtī-e-ḳhush-bayāñ huuñ maiñ

mujh hī meñ zam haiñ jaan le dariyā tamām dahr ke

qatra na tū mujhe samajh ik bahr-e-be-karāñ huuñ maiñ

nāzāñ hai ḳhadd-o-ḳhāl par apne bahut agar to sun

mujh meñ sabhī ke aks haiñ ā.īna-e-jahāñ huuñ maiñ

pahle bhī maiñ qarīb thā ab bhī tire qarīb huuñ

mahsūs kar mujhe tirā ham-zād-e-jism-o-jāñ huuñ maiñ

phūloñ se pyaar kar magar mujh ko na dil-figār kar

kāñTā bhī huuñ agar to kyā phūloñ ke darmiyāñ huuñ maiñ

apnoñ meñ maiñ hī ġhair huuñ ġhairoñ se kyā gila 'zafar'

apne hī ghar meñ huuñ magar ġhairoñ ke darmiyāñ huuñ maiñ

simTun to sifr sa lagun failun to ek jahan hun main

jitni ki ye zamin hai utna hi aasman hun main

mere hi dam-qadam se hain qaem ye naghma-KHwaniyan

gulzar-e-hast-e-bud ka tuti-e-KHush-bayan hun main

mujh hi mein zam hain jaan le dariya tamam dahr ke

qatra na tu mujhe samajh ek bahr-e-be-karan hun main

nazan hai KHadd-o-KHal par apne bahut agar to sun

mujh mein sabhi ke aks hain aaina-e-jahan hun main

pahle bhi main qarib tha ab bhi tere qarib hun

mahsus kar mujhe tera ham-zad-e-jism-o-jaan hun main

phulon se pyar kar magar mujh ko na dil-figar kar

kanTa bhi hun agar to kya phulon ke darmiyan hun main

apnon mein main hi ghair hun ghairon se kya gila 'zafar'

apne hi ghar mein hun magar ghairon ke darmiyan hun main