sirf baaton se bahal jaane ka qail to nahin

sirf bātoñ se bahal jaane kā qaa.il to nahīñ

dil mirā saada hai ehsās se ġhāfil to nahīñ

vaar kartā hai nazar se yahī qātil to nahīñ

choT khā kar jo taḌaptā hai mirā dil to nahīñ

shor-o-ġhul baḌhtā hī jaatā hai mire kānoñ meñ

dil meñ jo hai vahī tūfāñ lab-e-sāhil to nahīñ

qāfile vāloñ ne bistar jahāñ apne khole

sach to ye hai vo mire naam kī manzil to nahīñ

sāmnā ho to pata bhī chale phir kaun hai kyā

maiñ ne maanā ki koī mere muqābil to nahīñ

mahfileñ aur bhī haiñ husn-o-adā kī lekin

terī mahfil kī tarah ab koī mahfil to nahīñ

ham to tayyār haiñ ik hashr uThāne ke liye

aap ḳhud hī kisī tūfān se ġhāfil to nahīñ

duur hī se nazar aa jaatā hai 'jāmī' terā

bhiiḌ meñ rah ke bhī vo bhiiḌ meñ shāmil to nahīñ

sirf baaton se bahal jaane ka qail to nahin

dil mera sada hai ehsas se ghafil to nahin

war karta hai nazar se yahi qatil to nahin

choT kha kar jo taDapta hai mera dil to nahin

shor-o-ghul baDhta hi jata hai mere kanon mein

dil mein jo hai wahi tufan lab-e-sahil to nahin

qafile walon ne bistar jahan apne khole

sach to ye hai wo mere nam ki manzil to nahin

samna ho to pata bhi chale phir kaun hai kya

main ne mana ki koi mere muqabil to nahin

mahfilen aur bhi hain husn-o-ada ki lekin

teri mahfil ki tarah ab koi mahfil to nahin

hum to tayyar hain ek hashr uThane ke liye

aap KHud hi kisi tufan se ghafil to nahin

dur hi se nazar aa jata hai 'jami' tera

bhiD mein rah ke bhi wo bhiD mein shamil to nahin