sirf ye to nahin dariya mein utar sakta hun

sirf ye to nahīñ dariyā meñ utar saktā huuñ

maiñ kisī vaqt bhī maujoñ se ubhar saktā huuñ

tū zamāne se mujhe itnā bhī mahfūz na rakh

maiñ to ab terī hifāzat meñ bhī mar saktā huuñ

tū mirī zaat ko ab āḳhirī tārīḳh na de

is se pahle to maiñ kuchh aur bhī kar saktā huuñ

tū ne bātoñ se dikhā.e haiñ manāzir jo yahāñ

maiñ to is peT ko va.adoñ se bhī bhar saktā huuñ

ye jo baḌh-chaḌh ke navāzā hai mujhe tū ne yahāñ

ik isī baat kī hairat se bikhar saktā huuñ

ḳhauf dīvār ke girne kā nahīñ hai 'shahzād'

maiñ to dīvār ke hilne se bhī Dar saktā huuñ

sirf ye to nahin dariya mein utar sakta hun

main kisi waqt bhi maujon se ubhar sakta hun

tu zamane se mujhe itna bhi mahfuz na rakh

main to ab teri hifazat mein bhi mar sakta hun

tu meri zat ko ab aaKHiri tariKH na de

is se pahle to main kuchh aur bhi kar sakta hun

tu ne baaton se dikhae hain manazir jo yahan

main to is peT ko wadon se bhi bhar sakta hun

ye jo baDh-chaDh ke nawaza hai mujhe tu ne yahan

ek isi baat ki hairat se bikhar sakta hun

KHauf diwar ke girne ka nahin hai 'shahzad'

main to diwar ke hilne se bhi Dar sakta hun