sisak rahi hai andheron mein sham-e-tanhai

sisak rahī hai añdheroñ meñ shām-e-tanhā.ī

koī charāġh jalāo ba-nām-e-tanhā.ī

sadā rahe yūñhī ābād shahr-e-shīshagarāñ

ki mere naam kiyā vaqf jām-e-tanhā.ī

ravish ravish jo haiñ TuuTe hue kuchh ā.īne

qadam qadam hai nishān-e-ḳhirām-e-tanhā.ī

ye kis ḳhayāl se raushan hai rū-e-shām-e-firāq

ye kaisī lau se damaktā hai bām-e-tanhā.ī

sajā.ī hoñToñ pe dīvār-o-dar kī ḳhāmoshī

kuchh is tarah bhī kiyā ehtimām-e-tanhā.ī

likhī haiñ palkoñ se be-harf bhī munājāteñ

kalām-e-fan se kiyā ehtirām-e-tanhā.ī

chamakte dard se 'akram' sahīfa-e-dil par

ubhar rahā hai musalsal kalām-e-tanhā.ī

sisak rahi hai andheron mein sham-e-tanhai

koi charagh jalao ba-nam-e-tanhai

sada rahe yunhi aabaad shahr-e-shishagaran

ki mere nam kiya waqf jam-e-tanhai

rawish rawish jo hain TuTe hue kuchh aaine

qadam qadam hai nishan-e-KHiram-e-tanhai

ye kis KHayal se raushan hai ru-e-sham-e-firaq

ye kaisi lau se damakta hai baam-e-tanhai

sajai honTon pe diwar-o-dar ki KHamoshi

kuchh is tarah bhi kiya ehtimam-e-tanhai

likhi hain palkon se be-harf bhi munajaten

kalam-e-fan se kiya ehtiram-e-tanhai

chamakte dard se 'akram' sahifa-e-dil par

ubhar raha hai musalsal kalam-e-tanhai