sitare shams qamar kahkashan banaenge

sitāre shams qamar kahkashāñ banā.eñge

isī zamīn pe ham āsmāñ banā.eñge

sunā hai dhuup se bezār ho ke kuchh ahbāb

kisī pahāḌ kī tah meñ makāñ banā.eñge

hamesha saath meñ rahnā bhī ek aafat hai

so apne aap se ham dūriyāñ banā.eñge

na hogā nām-o-nishāñ bhī jahāñ pe nafrat kā

mohabbatoñ se bharā vo jahāñ banā.eñge

yaqīn toḌ diyā karte haiñ jahāñ vaale

so ab yaqīn nahīñ ham gumāñ banā.eñge

milegā haq jo banāne kā aur miTāne kā

fulāñ miTā.eñge 'alkā' fulāñ banā.eñge

sitare shams qamar kahkashan banaenge

isi zamin pe hum aasman banaenge

suna hai dhup se bezar ho ke kuchh ahbab

kisi pahaD ki tah mein makan banaenge

hamesha sath mein rahna bhi ek aafat hai

so apne aap se hum duriyan banaenge

na hoga nam-o-nishan bhi jahan pe nafrat ka

mohabbaton se bhara wo jahan banaenge

yaqin toD diya karte hain jahan wale

so ab yaqin nahin hum guman banaenge

milega haq jo banane ka aur miTane ka

fulan miTaenge 'alka' fulan banaenge