sitaro tum na so jaana abhi kuchh raat baqi hai

sitāro tum na so jaanā abhī kuchh raat baaqī hai

adhūrī dāstāñ merī hai aur kuchh baat baaqī hai

maiñ vāpas jā rahā thā mil ke un se bin kahe lekin

mire dil ne pukārā Thahro un se baat baaqī hai

hamārī manzileñ ik haiñ judā haiñ rāste be-shak

magar naqsh-e-qadam har rahguzar par saat baaqī hai

pahuñch kar leñge dam ham manzil-e-maqsūd par hamdam

yaqīñ kāmil hai ye dil ko ki us kī zaat baaqī hai

tarannum ban ga.ī āvāz merī jab bhī maiñ royā

ye terā zarf hai tū jāntā kyā baat baaqī hai

shab-e-furqat kī ghaḌiyāñ ginte ginte umr guzrī hai

sahārā kyā sahar detī ki dil meñ raat baaqī hai

fanā honā thā ik din so fanā hotī ga.ī har shai

na ye baaqī na vo baaqī faqat ik zaat baaqī hai

sukūn-e-dil mayassar ho 'sa.īd' us shaḳhs se kaise

abhī to āḳhirī manzil pe us kī maat baaqī hai

sitaro tum na so jaana abhi kuchh raat baqi hai

adhuri dastan meri hai aur kuchh baat baqi hai

main wapas ja raha tha mil ke un se bin kahe lekin

mere dil ne pukara Thahro un se baat baqi hai

hamari manzilen ek hain juda hain raste be-shak

magar naqsh-e-qadam har rahguzar par sat baqi hai

pahunch kar lenge dam hum manzil-e-maqsud par hamdam

yaqin kaamil hai ye dil ko ki us ki zat baqi hai

tarannum ban gai aawaz meri jab bhi main roya

ye tera zarf hai tu jaanta kya baat baqi hai

shab-e-furqat ki ghaDiyan ginte ginte umr guzri hai

sahaara kya sahar deti ki dil mein raat baqi hai

fana hona tha ek din so fana hoti gai har shai

na ye baqi na wo baqi faqat ek zat baqi hai

sukun-e-dil mayassar ho 'said' us shaKHs se kaise

abhi to aaKHiri manzil pe us ki mat baqi hai