sitam hai tere aashiq ke liye bimar ho jaana

sitam hai tere 'āshiq ke liye bīmār ho jaanā

baḌī aafat hai dil ke haath se nā-chār ho jaanā

badal jaanā nigāhoñ kā to dekhā par nahīñ dekhā

dil-e-āshiq se us kā tiir ban kar paar ho jaanā

nasīhat se vo baaz aatā nahīñ tum baaz aaoge

pahuñchnā sāmne nāseh ke jab sarshār ho jaanā

kiyā hai ashk-e-hasrat tū ne rusvā mujh ko mahfil meñ

kahā kis ne ki yuuñ mere gale kā haar ho jaanā

akele meñ tasavvur ḳhuub karnā us sitam-gar kā

lahad meñ ḳhvāb-e-ġhaflat se agar bedār ho jaanā

Dil-e-pur-ġham raqīb rū-siyah dekhe nahīñ tujh ko

galī meñ us kī jā kar sāya-e-dīvār ho jaanā

nahīñ furqat gavārā tā.ir-e-dil tum ko dilbar ke

pahuñchte hī asīr-e-gesū-e-ḳham-dār ho jaanā

ḳhudā hāfiz hai apnā dekhiye kaisī guzartī hai

baḌī mushkil hai rāh-e-ishq kā dushvār ho jaanā

qadam-bosī mayassar ho kisī sūrat se us but kī

'jamīla' ba.ad-e-murdan ḳhāk-e-kū-e-yār ho jaanā

sitam hai tere 'ashiq ke liye bimar ho jaana

baDi aafat hai dil ke hath se na-chaar ho jaana

badal jaana nigahon ka to dekha par nahin dekha

dil-e-ashiq se us ka tir ban kar par ho jaana

nasihat se wo baz aata nahin tum baz aaoge

pahunchna samne naseh ke jab sarshaar ho jaana

kiya hai ashk-e-hasrat tu ne ruswa mujh ko mahfil mein

kaha kis ne ki yun mere gale ka haar ho jaana

akele mein tasawwur KHub karna us sitam-gar ka

lahad mein KHwab-e-ghaflat se agar bedar ho jaana

Dil-e-pur-gham raqib ru-siyah dekhe nahin tujh ko

gali mein us ki ja kar saya-e-diwar ho jaana

nahin furqat gawara tair-e-dil tum ko dilbar ke

pahunchte hi asir-e-gesu-e-KHam-dar ho jaana

KHuda hafiz hai apna dekhiye kaisi guzarti hai

baDi mushkil hai rah-e-ishq ka dushwar ho jaana

qadam-bosi mayassar ho kisi surat se us but ki

'jamila' baad-e-murdan KHak-e-ku-e-yar ho jaana