sitam karna karam karna wafa karna jafa karna

sitam karnā karam karnā vafā karnā jafā karnā

magar jo ahd kar lenā vo āḳhir tak vafā karnā

kiyā ḳhalvat meñ mujh ko qatl aur mahfil meñ rote ho

qayāmat Dhā ke achchhā yaad hai mahshar bapā karnā

batā ai husn kab tak ishq kī taqdīr meñ āḳhir

ba-minnat dil diyā karnā ba-hasrat muñh takā karnā

na dil vāpas na dildārī ye kyā sheva hai tum ko to

na aayā qarz adā karnā na aayā farz adā karnā

sharāb-e-ishq har millat meñ har maz.hab meñ jaa.ez hai

ye kyā aafat hai ai vaa.iz ravā ko nāravā karnā

nigāh-e-mast-e-sāqī bāda-ḳhvāroñ se ye kahtī hai

butoñ kī jab nazar se gir paḌo yād-e-ḳhudā karnā

tumhārā nām-levā mo'taqid aulād-e-mid.hat-gar

'saḳhā' kī mushkileñ hal yā-alī mushkil-kushā karnā

sitam karna karam karna wafa karna jafa karna

magar jo ahd kar lena wo aaKHir tak wafa karna

kiya KHalwat mein mujh ko qatl aur mahfil mein rote ho

qayamat Dha ke achchha yaad hai mahshar bapa karna

bata ai husn kab tak ishq ki taqdir mein aaKHir

ba-minnat dil diya karna ba-hasrat munh taka karna

na dil wapas na dildari ye kya shewa hai tum ko to

na aaya qarz ada karna na aaya farz ada karna

sharab-e-ishq har millat mein har mazhab mein jaez hai

ye kya aafat hai ai waiz rawa ko narawa karna

nigah-e-mast-e-saqi baada-KHwaron se ye kahti hai

buton ki jab nazar se gir paDo yaad-e-KHuda karna

tumhaara nam-lewa mo'taqid aulad-e-midhat-gar

'saKHa' ki mushkilen hal ya-ali mushkil-kusha karna