sitam ke mare lahu mein Dube hue nazaron ka kya karunga

sitam ke maare lahū meñ Duube hue nazāroñ kā kyā karūñgā

sisakte ġhuncho tumhīñ batāo maiñ in bahāroñ kā kyā karūñgā

jinheñ bharosa ho āsmāñ par vo āsmāñ se panāh māñgeñ

maiñ apne zarroñ se mutma.in huuñ maiñ chāñd-tāroñ kā kyā karūñgā

agar mujhe de sake zamāna to kuchh na.e zaḳhm aur de de

maiñ ġhamgusāroñ ko jāntā huuñ maiñ ġhamgusāroñ kā kyā karūñgā

haiñ shām-e-ġhurbat kī tīrgī meñ mujhe mire ashk hī ġhanīmat

ho jin kī qismat meñ ḳhud hī gardish maiñ un sitāroñ kā kyā karūñgā

maiñ ḳhud hī tūfāñ huuñ apnā sāhil nikāl lūñgā yahīñ kahīñ se

jahāñ safīne bhī Duub jaa.eñ maiñ un kināroñ kā kyā karūñgā

tumhāre dair-o-haram ke jalve tumheñ mubārak tumhīñ sambhālo

mujhe haqīqat kī justujū hai maiñ ḳhvāb-zāroñ kā kyā karūñgā

abhī to dāmān-e-ġhuncha-o-gul se lūñgā maiñ intiqām 'arshad'

abhī junūñ mo'atabar nahīñ hai abhī bahāroñ kā kyā karūñgā

sitam ke mare lahu mein Dube hue nazaron ka kya karunga

sisakte ghuncho tumhin batao main in bahaaron ka kya karunga

jinhen bharosa ho aasman par wo aasman se panah mangen

main apne zarron se mutmain hun main chand-taron ka kya karunga

agar mujhe de sake zamana to kuchh nae zaKHm aur de de

main ghamgusaron ko jaanta hun main ghamgusaron ka kya karunga

hain sham-e-ghurbat ki tirgi mein mujhe mere ashk hi ghanimat

ho jin ki qismat mein KHud hi gardish main un sitaron ka kya karunga

main KHud hi tufan hun apna sahil nikal lunga yahin kahin se

jahan safine bhi Dub jaen main un kinaron ka kya karunga

tumhaare dair-o-haram ke jalwe tumhein mubarak tumhin sambhaalo

mujhe haqiqat ki justuju hai main KHwab-zaron ka kya karunga

abhi to daman-e-ghuncha-o-gul se lunga main intiqam 'arshad'

abhi junun mo'atabar nahin hai abhi bahaaron ka kya karunga