sitam ke parde mein phir karam kar sukun ko iztirab kar de

sitam ke parde meñ phir karam kar sukūn ko iztirāb kar de

dil-e-fasurda ko zindagī de shabāb ko phir shabāb kar de

ye maanā lākhoñ hikāyateñ haiñ hazāroñ dil meñ shikāyateñ haiñ

magar kaheñ kyā jo ik nazar meñ koī hameñ lā-javāb kar de

Thahar dil-e-be-qarār dam bhar vo aa.e haiñ be-hijāb ho kar

sambhal ki ye iztirāb-e-nau hī kahīñ na haa.il naqāb kar de

vo ālam-e-be-ḳhudī ho dil par vo kaifiyat be-hisī kī chhā.e

jo ārzū-e-karam miTā de jo be-niyāz-e-itāb kar de

na aa.egā lab pe harf-e-matlab na khul sakegī zabān-e-'kaifī'

nigāh-e-hasrat ko tarjumāñ kar ḳhamoshiyoñ ko javāb kar de

sitam ke parde mein phir karam kar sukun ko iztirab kar de

dil-e-fasurda ko zindagi de shabab ko phir shabab kar de

ye mana lakhon hikayaten hain hazaron dil mein shikayaten hain

magar kahen kya jo ek nazar mein koi hamein la-jawab kar de

Thahar dil-e-be-qarar dam bhar wo aae hain be-hijab ho kar

sambhal ki ye iztirab-e-nau hi kahin na hail naqab kar de

wo aalam-e-be-KHudi ho dil par wo kaifiyat be-hisi ki chhae

jo aarzu-e-karam miTa de jo be-niyaz-e-itab kar de

na aaega lab pe harf-e-matlab na khul sakegi zaban-e-'kaifi'

nigah-e-hasrat ko tarjuman kar KHamoshiyon ko jawab kar de