sitam ko jo sitam kahta nahin hai

sitam ko jo sitam kahtā nahīñ hai

vo achchhā aadmī achchhā nahīñ hai

qabīle meñ koī aisā nahīñ hai

adū se jis kā samjhauta nahīñ hai

maiñ lāshoñ ko sadā.eñ de rahā huuñ

ki zindoñ meñ koī zinda nahīñ hai

mirī poshāk par paivand to haiñ

mirī poshāk par dhabba nahīñ hai

hilānā haath terā jaate jaate

vo manzar aaj bhī bhūlā nahīñ hai

safar meñ aa ga.ī ye kaisī manzil

jahāñ aage koī rasta nahīñ hai

hamārī aah par bahseñ bahut haiñ

tumhāre jurm kā charchā nahīñ hai

adā-e-shaiḳh-sarhindī salāmat

kisī bul-fazl se rishta nahīñ hai

sunā hai zill-e-sub.hānī haiñ nārāz

abhī 'bazmī' to kuchh bolā nahīñ hai

sitam ko jo sitam kahta nahin hai

wo achchha aadmi achchha nahin hai

qabile mein koi aisa nahin hai

adu se jis ka samjhauta nahin hai

main lashon ko sadaen de raha hun

ki zindon mein koi zinda nahin hai

meri poshak par paiwand to hain

meri poshak par dhabba nahin hai

hilana hath tera jate jate

wo manzar aaj bhi bhula nahin hai

safar mein aa gai ye kaisi manzil

jahan aage koi rasta nahin hai

hamari aah par bahsen bahut hain

tumhaare jurm ka charcha nahin hai

ada-e-shaiKH-sarhindi salamat

kisi bul-fazl se rishta nahin hai

suna hai zill-e-subhani hain naraaz

abhi 'bazmi' to kuchh bola nahin hai