sitamgar tujhse hum kab shikwa-e-bedad karte hain

sitamgar tujh se ham kab shikva-e-bedād karte haiñ

hameñ fariyād kī aadat hai ham fariyād karte haiñ

matā.a-e-zindagānī aur bhī barbād karte haiñ

ham is sūrat se taskīn-e-dil-e-nāshād karte haiñ

havāo ek pal ke vāste lillāh ruk jaao

vo merī arz par dhīme se kuchh irshād karte haiñ

na jaane kyuuñ ye duniyā chain se jiine nahīñ detī

koī pūchhe ham is par kaun sī be-dād karte haiñ

nazar aatā hai un meñ beshtar ik narm-o-nāzuk dil

masā.ib ke liye siine ko jo faulād karte haiñ

ḳhudā kī maslahat kuchh is meñ hogī varna behis but

kise shādāñ banāte haiñ kise nāshād karte haiñ

nahīñ dekhā kahīñ jo mājrā-e-ishq meñ dekhā

ki ahl-e-dard chup haiñ chāra-gar fariyād karte haiñ

asīr-e-dā.imī gar dil na ho to aur kyā ho jab

kahīñ vo muskurā kar jā tujhe āzād karte haiñ

kiyā hogā kabhī aadam ko sajda kahne sunñe se

farishte ab kahāñ parvā-e-ādam-zād karte haiñ

hameñ ai dosto chup-chāp mar jaanā bhī aatā hai

taḌap kar ik zarā dil-jūī-e-sayyād karte haiñ

bahut saada sā hai ai 'kaif' apne ġham kā afsāna

vo ham ko bhuul baiThe haiñ jinheñ ham yaad karte haiñ

sitamgar tujh se hum kab shikwa-e-bedad karte hain

hamein fariyaad ki aadat hai hum fariyaad karte hain

mataa-e-zindagani aur bhi barbaad karte hain

hum is surat se taskin-e-dil-e-nashad karte hain

hawao ek pal ke waste lillah ruk jao

wo meri arz par dhime se kuchh irshad karte hain

na jaane kyun ye duniya chain se jine nahin deti

koi puchhe hum is par kaun si be-dad karte hain

nazar aata hai un mein beshtar ek narm-o-nazuk dil

masaib ke liye sine ko jo faulad karte hain

KHuda ki maslahat kuchh is mein hogi warna behis but

kise shadan banate hain kise nashad karte hain

nahin dekha kahin jo majra-e-ishq mein dekha

ki ahl-e-dard chup hain chaara-gar fariyaad karte hain

asir-e-daimi gar dil na ho to aur kya ho jab

kahin wo muskura kar ja tujhe aazad karte hain

kiya hoga kabhi aadam ko sajda kahne sunne se

farishte ab kahan parwa-e-adam-zad karte hain

hamein ai dosto chup-chap mar jaana bhi aata hai

taDap kar ek zara dil-jui-e-sayyaad karte hain

bahut sada sa hai ai 'kaif' apne gham ka afsana

wo hum ko bhul baiThe hain jinhen hum yaad karte hain