sitamgaron ka sitam hum pe aam aaj bhi hai

sitamgaroñ kā sitam ham pe 'aam aaj bhī hai

hamāre vāste har sub.h shaam aaj bhī hai

jinhoñ ne rāh-e-vafā meñ luTā diyā sab kuchh

vo mar ga.e haiñ magar un kā naam aaj bhī hai

unhoñ ne dil se hameñ duur kar diyā lekin

hamāre dil meñ to un kā qiyām aaj bhī hai

ta'alluqāt agar munqata' hue to kyā

hamārā un se du’ā-o-salām aaj bhī hai

mujhe ye haq bhī nahīñ hai ki haq kī baat kahūñ

zabāñ 'adū kī mire be-lagām aaj bhī hai

jo bad-ma'āsh haiñ chaltā hai raaj un kā to

sharīf logoñ kā jiinā harām aaj bhī hai

ye kis ne kah diyā āzād ham hue 'faisal'

hamārā dil to kisī kā ġhulām aaj bhī hai

sitamgaron ka sitam hum pe 'am aaj bhi hai

hamare waste har subh sham aaj bhi hai

jinhon ne rah-e-wafa mein luTa diya sab kuchh

wo mar gae hain magar un ka nam aaj bhi hai

unhon ne dil se hamein dur kar diya lekin

hamare dil mein to un ka qiyam aaj bhi hai

ta'alluqat agar munqata' hue to kya

hamara un se du’a-o-salam aaj bhi hai

mujhe ye haq bhi nahin hai ki haq ki baat kahun

zaban 'adu ki mere be-lagam aaj bhi hai

jo bad-ma'ash hain chalta hai raj un ka to

sharif logon ka jina haram aaj bhi hai

ye kis ne kah diya aazad hum hue 'faisal'

hamara dil to kisi ka ghulam aaj bhi hai