siyah raat ke dariya ko par karte chalo

siyāh raat ke dariyā ko paar karte chalo

bas ek dūsre ko hoshiyār karte chalo

ufuq ke nuur se gar mutma.in na ho paao

nasīm-e-sub.h kā to e'tibār karte chalo

baTor laao zarā ḳhud ko chaar samtoñ se

safeñ banā ke baḌho ab qatār karte chalo

qayām tā.iro kuchh der mere āñgan meñ

tamām ghar ko mire ḳhush-gavār karte chalo

tumhārī baat se mujh ko to ittifāq nahīñ

muḳhālifoñ meñ mujhe bhī shumār karte chalo

usuul ek hī hotā hai sirf jañgal kā

shikār bante raho yā shikār karte chalo

jo saltanat hai tumhārī to lāzmī hai kyā

chaman tamām ko tum regzār karte chalo

ḳhulūs ḳharch karo haath khol kar 'saurabh'

luTāo pyaar dil-o-jāñ nisār karte chalo

siyah raat ke dariya ko par karte chalo

bas ek dusre ko hoshiyar karte chalo

ufuq ke nur se gar mutmain na ho pao

nasim-e-subh ka to e'tibar karte chalo

baTor lao zara KHud ko chaar samton se

safen bana ke baDho ab qatar karte chalo

qayam tairo kuchh der mere aangan mein

tamam ghar ko mere KHush-gawar karte chalo

tumhaari baat se mujh ko to ittifaq nahin

muKHalifon mein mujhe bhi shumar karte chalo

usul ek hi hota hai sirf jangal ka

shikar bante raho ya shikar karte chalo

jo saltanat hai tumhaari to lazmi hai kya

chaman tamam ko tum regzar karte chalo

KHulus KHarch karo hath khol kar 'saurabh'

luTao pyar dil-o-jaan nisar karte chalo