siyah raat mein ek aasman aa ke gira

siyāh raat meñ ik āsmān aa ke girā

phir us ke baa'd to saarā jahān aa ke girā

maiñ mauj mauj meñ pyāsā lahū lahū kā thā

vo tishna-kām mire darmiyān aa ke girā

bikharte TūTte lamhoñ kā raqs jaarī thā

bas us ke biich koī mehrbān aa ke girā

har ek khiḌkī meñ kitne dahakte sūraj the

hamāre ḳhvāb meñ kaisā makān aa ke girā

na mujh meñ sub.h thī koī na shaam hī Thahrī

shab-e-ḳhayāl kā ik ik nishān aa ke girā

dayār-e-shab meñ har ik chehrā be-nishāñ thā magar

navāh-e-jāñ meñ ye kis kā nishān aa ke girā

maiñ ḳhvāb chhoḌ ke niklā thā us se milne ko

chalā thā do hī qadam sā.ebān aa ke girā

maiñ apnī zaat kī pahnā.iyoñ meñ khoyā thā

kise ḳhabar kahāñ us kā gumān aa ke girā

numūd-e-shauq kā har rang dekhnā thā mujhe

isī liye to tire darmiyān aa ke girā

mirī nigāh meñ kaise sulagte ḳheme haiñ

pas-e-shu.ūr 'ajab imtihān aa ke girā

siyah raat mein ek aasman aa ke gira

phir us ke ba'd to sara jahan aa ke gira

main mauj mauj mein pyasa lahu lahu ka tha

wo tishna-kaam mere darmiyan aa ke gira

bikharte TuTte lamhon ka raqs jari tha

bas us ke bich koi mehrban aa ke gira

har ek khiDki mein kitne dahakte suraj the

hamare KHwab mein kaisa makan aa ke gira

na mujh mein subh thi koi na sham hi Thahri

shab-e-KHayal ka ek ek nishan aa ke gira

dayar-e-shab mein har ek chehra be-nishan tha magar

nawah-e-jaan mein ye kis ka nishan aa ke gira

main KHwab chhoD ke nikla tha us se milne ko

chala tha do hi qadam saeban aa ke gira

main apni zat ki pahnaiyon mein khoya tha

kise KHabar kahan us ka guman aa ke gira

numud-e-shauq ka har rang dekhna tha mujhe

isi liye to tere darmiyan aa ke gira

meri nigah mein kaise sulagte KHeme hain

pas-e-shuur 'ajab imtihan aa ke gira