siyah shab ki balaon ke hath lag gae the

siyāh shab kī balāoñ ke haath lag ga.e the

mire charāġh havāoñ ke haath lag ga.e the

vo le ke katraneñ guḌiyā banāne lag ga.ī thī

ki shahr-zādī ko gaañv ke haath lag ga.e the

hamārī maut yaqīnī batā.ī jā rahī thī

hamāre ḳhat bhī ḳhudāoñ ke haath lag ga.e the

hamāre jism ki ghoḌoñ kī Tāpoñ meñ paḌe the

hamāre sar ki sināoñ ke haath lag ga.e the

zamīn-zāde zamīñ se laḌā.ī karne lage

ki un ke zehn ḳhalāoñ ke haath lag ga.e the

hamārī āñkheñ nazāroñ meñ qaid ho ga.iiñ thiiñ

hamāre kaan sadāoñ ke haath lag ga.e the

hamārī rañgateñ har aan piilī paḌ rahīñ thiiñ

hamārī dhuup ko chhāñv ke haath lag ga.e the

hamārī shāḳhoñ pe bas ḳhaar bach ga.e the 'safīr'

hamāre phuul ḳhizāoñ ke haath lag ga.e the

siyah shab ki balaon ke hath lag gae the

mere charagh hawaon ke hath lag gae the

wo le ke katranen guDiya banane lag gai thi

ki shahr-zadi ko ganw ke hath lag gae the

hamari maut yaqini batai ja rahi thi

hamare KHat bhi KHudaon ke hath lag gae the

hamare jism ki ghoDon ki Tapon mein paDe the

hamare sar ki sinaon ke hath lag gae the

zamin-zade zamin se laDai karne lage

ki un ke zehn KHalaon ke hath lag gae the

hamari aankhen nazaron mein qaid ho gain thin

hamare kan sadaon ke hath lag gae the

hamari rangaten har aan pili paD rahin thin

hamari dhup ko chhanw ke hath lag gae the

hamari shaKHon pe bas KHar bach gae the 'safir'

hamare phul KHizaon ke hath lag gae the