siyaq-e-sher mein ek harf be-sarfa nahin hota

siyāq-e-she'r meñ ik harf be-sarfa nahīñ hotā

vahīñ likhte haiñ ham kuchh jis jagah likkhā nahīñ hotā

suḳhan-dānoñ kā kuchh iz.hār jhūTā ho bhī saktā hai

suḳhan-fahmoñ kā lekin tabsira jhūTā nahīñ hotā

dukhī dil dukhtī āñkhoñ par havā bhī baar hotī hai

mahaktī Dāliyoñ ko is kā andāza nahīñ hotā

surūr-e-fikr-o-fan bhī kitnī mīThī chiiz hotā hai

kisī talḳhī se is kā zā.iqa phīkā nahīñ hotā

agar ḳhalq-e-ḳhudā ne terī ḳhushbū sūñgh lī hotī

kisī ḳhushbū kā bazm-e-dahr meñ charchā nahīñ hotā

use kahte haiñ rasta jis jagah manzil nahīñ hotī

jahāñ hotī hai manzil us jagah rasta nahīñ hotā

ye patthar-lafz se dariyā ma'ānī ke nahīñ bahte

agar tesha parakh-pahchān kā sīkhā nahīñ hotā

bahut kam log is tahrīr kī tah tak pahuñchte haiñ

sabhī kuchh vaqt kī dīvār par likkhā nahīñ hotā

saḌak ke aadmī hī par saḌak kī dhuul hotī hai

jo mahloñ meñ haiñ un kā haath tak mailā nahīñ hotā

nayā iz.hār māñge hai suḳhan meñ valvala taaza

faqat alfāz se paidā nayā lahja nahīñ hotā

mirī āñkhoñ ne 'vasfī' ek aisā ḳhvāb dekhā hai

vahāñ bhī ḳhauf lagtā hai jahāñ ḳhatra nahīñ hotā

siyaq-e-she'r mein ek harf be-sarfa nahin hota

wahin likhte hain hum kuchh jis jagah likkha nahin hota

suKHan-danon ka kuchh izhaar jhuTa ho bhi sakta hai

suKHan-fahmon ka lekin tabsira jhuTa nahin hota

dukhi dil dukhti aankhon par hawa bhi bar hoti hai

mahakti Daliyon ko is ka andaza nahin hota

surur-e-fikr-o-fan bhi kitni miThi chiz hota hai

kisi talKHi se is ka zaiqa phika nahin hota

agar KHalq-e-KHuda ne teri KHushbu sungh li hoti

kisi KHushbu ka bazm-e-dahr mein charcha nahin hota

use kahte hain rasta jis jagah manzil nahin hoti

jahan hoti hai manzil us jagah rasta nahin hota

ye patthar-lafz se dariya ma'ani ke nahin bahte

agar tesha parakh-pahchan ka sikha nahin hota

bahut kam log is tahrir ki tah tak pahunchte hain

sabhi kuchh waqt ki diwar par likkha nahin hota

saDak ke aadmi hi par saDak ki dhul hoti hai

jo mahlon mein hain un ka hath tak maila nahin hota

naya izhaar mange hai suKHan mein walwala taza

faqat alfaz se paida naya lahja nahin hota

meri aankhon ne 'wasfi' ek aisa KHwab dekha hai

wahan bhi KHauf lagta hai jahan KHatra nahin hota