soch apni badal raha hun main

soch apnī badal rahā huuñ maiñ

kaf-e-afsos mal rahā huuñ maiñ

jo masarrat ko maat detī hai

fikr meñ aisī Dhal rahā huuñ maiñ

zulmat-e-shab meñ raushnī ke liye

sham.a kī tarah jal rahā huuñ maiñ

misl-e-gul ḳhush-nasīb huuñ kitnā

biich kāñToñ ke pal rahā huuñ maiñ

ātish-e-ġham lagī hai siine meñ

mom jaisā pighal rahā huuñ maiñ

zulm par ehtijāj lāzim hai

ḳhuun muñh se ugal rahā huuñ maiñ

ye bhī kār-e-jihād hai 'sāhil'

harf-e-haq par aTal rahā huuñ maiñ

soch apni badal raha hun main

kaf-e-afsos mal raha hun main

jo masarrat ko mat deti hai

fikr mein aisi Dhal raha hun main

zulmat-e-shab mein raushni ke liye

shama ki tarah jal raha hun main

misl-e-gul KHush-nasib hun kitna

bich kanTon ke pal raha hun main

aatish-e-gham lagi hai sine mein

mom jaisa pighal raha hun main

zulm par ehtijaj lazim hai

KHun munh se ugal raha hun main

ye bhi kar-e-jihad hai 'sahil'

harf-e-haq par aTal raha hun main