soch ka irtiqa samundar hai

soch kā irtiqā samundar hai

pāniyoñ kā ḳhudā samundar hai

'ishq kī ibtidā haiñ ye aañsū

pyaas kī intihā samundar hai

mere baare meñ jāntā hai sab

ye mirā ham-navā samundar hai

kaun is meñ na Dūbnā chāhe

kis qadar dilrubā samundar hai

koī is ko kahāñ samajh paa.e

zaat kā silsila samundar hai

jab talak aañkh se nahīñ bahtā

ashk ik be-bahā samundar hai

us kī āñkhoñ se maiñ ne dekhā hai

nīlgūñ aur harā samundar hai

is meñ jhāñkā to duub sakte ho

aañkh be-intihā samundar hai

do hī chīzoñ meñ raaz pinhāñ haiñ

merī āñkheñ haiñ yā samundar hai

ḳhvāb kī bad-du'ā hai bedārī

tishnagī kī du'ā samundar hai

soch ka irtiqa samundar hai

paniyon ka KHuda samundar hai

'ishq ki ibtida hain ye aansu

pyas ki intiha samundar hai

mere bare mein jaanta hai sab

ye mera ham-nawa samundar hai

kaun is mein na Dubna chahe

kis qadar dilruba samundar hai

koi is ko kahan samajh pae

zat ka silsila samundar hai

jab talak aankh se nahin bahta

ashk ek be-baha samundar hai

us ki aankhon se main ne dekha hai

nilgun aur hara samundar hai

is mein jhanka to dub sakte ho

aankh be-intiha samundar hai

do hi chizon mein raaz pinhan hain

meri aankhen hain ya samundar hai

KHwab ki bad-du'a hai bedari

tishnagi ki du'a samundar hai