soch ki rah-guzar se aage hain

soch kī rah-guzar se aage haiñ

is liye rāhbar se aage haiñ

vo jidhar DhūñDte rahe ham ko

ham safar meñ udhar se aage haiñ

manzaroñ par yaqīn mat kiije

saare manzar nazar se aage haiñ

raat Dhalne kī yuuñ ḳhushī na manā

mā'rke ab sahar se aage haiñ

ghar jalā kar mirā haiñ ḳhauf-zada

jin ke ghar mere ghar se aage haiñ

Thos bātoñ pe hai yaqīñ apnā

ham agar aur magar se aage haiñ

ham jo pīchhe haiñ kuchh sabab hai 'riyāz'

aap to shor-o-shar se aage haiñ

soch ki rah-guzar se aage hain

is liye rahbar se aage hain

wo jidhar DhunDte rahe hum ko

hum safar mein udhar se aage hain

manzaron par yaqin mat kije

sare manzar nazar se aage hain

raat Dhalne ki yun KHushi na mana

ma'rke ab sahar se aage hain

ghar jala kar mera hain KHauf-zada

jin ke ghar mere ghar se aage hain

Thos baaton pe hai yaqin apna

hum agar aur magar se aage hain

hum jo pichhe hain kuchh sabab hai 'riyaz'

aap to shor-o-shar se aage hain