soch rakkhi thin bahut baaten main ab bhul gaya

soch rakkhī thiiñ bahut bāteñ maiñ ab bhuul gayā

rañg-e-mahfil hī kuchh aisā hai ki sab bhuul gayā

vo aziyyat thī ki din raat guzarte hī na the

phir huā yuuñ ki aziyyat kā sabab bhuul gayā

ye mirā sar ko jhaTaknā tujhe samjhātā nahīñ

kab tire sehr se niklā tujhe kab bhuul gayā

ek hī ruḳh pe paḌā ḳhud se maiñ uktāne lagā

itnā uktāyā ki jiine kī talab bhuul gayā

mujh ko ye fikr bhī rahtī ki vo sab dekhtā hai

mujh ko ye ġham bhī lagā rahtā ki rab bhuul gayā

tishnagī itnī ziyāda thī ki piite piite

ek dariyā ke bahāv pe maiñ lab bhuul gayā

kyā tujhe yaad nahīñ merā sadā.eñ denā

kyā mirī bāñheñ mirī chashm-e-talab bhuul gayā

dekhne vāloñ ne muḌ muḌ ke tujhe dekhā thā

jis ne bhī dekhā vahī hadd-e-adab bhuul gayā

dekh tujh ġham meñ giraftār huuñ itnā 'shāhid'

maiñ shab-e-hafta ke sab aish-o-tarab bhuul gayā

soch rakkhi thin bahut baaten main ab bhul gaya

rang-e-mahfil hi kuchh aisa hai ki sab bhul gaya

wo aziyyat thi ki din raat guzarte hi na the

phir hua yun ki aziyyat ka sabab bhul gaya

ye mera sar ko jhaTakna tujhe samjhata nahin

kab tere sehr se nikla tujhe kab bhul gaya

ek hi ruKH pe paDa KHud se main uktane laga

itna uktaya ki jine ki talab bhul gaya

mujh ko ye fikr bhi rahti ki wo sab dekhta hai

mujh ko ye gham bhi laga rahta ki rab bhul gaya

tishnagi itni ziyaada thi ki pite pite

ek dariya ke bahaw pe main lab bhul gaya

kya tujhe yaad nahin mera sadaen dena

kya meri banhen meri chashm-e-talab bhul gaya

dekhne walon ne muD muD ke tujhe dekha tha

jis ne bhi dekha wahi hadd-e-adab bhul gaya

dekh tujh gham mein giraftar hun itna 'shahid'

main shab-e-hafta ke sab aish-o-tarab bhul gaya