socha nahin be-KHauf-o-KHatar kaT diya hai

sochā nahīñ be-ḳhauf-o-ḳhatar kaaT diyā hai

us ne mirā har misra-‘e-tar kaaT diyā hai

naubat hī nahīñ aa.ī ki talvār uThāte

dīvār ne uThte hī vo ghar kaaT diyā hai

is darja aziyyat meñ thā sālār ki us ne

sotī huī shahzādī kā sar kaaT diyā hai

ham donoñ ne aapas meñ koī baat nahīñ kī

sharmāte hue saarā safar kaaT diyā hai

ab is se ziyāda to tujhe kuchh nahīñ kahnā

kaafī hai ki ham ne tirā par kaaT diyā hai

tasvīr meñ bhaTkā huā ik shaḳhs banā kar

har raste ko tā-hadd-e-nazar kaaT diyā hai

dīvār pe likkhā huā sab kaaT diyā thā

sab kaaTā huā bār-e-digar kaaT diyā hai

ye kaaTe hue peḌ faqat chhāñv nahīñ the

logoñ ne mirā saarā hunar kaaT diyā hai

socha nahin be-KHauf-o-KHatar kaT diya hai

us ne mera har misra-‘e-tar kaT diya hai

naubat hi nahin aai ki talwar uThate

diwar ne uThte hi wo ghar kaT diya hai

is darja aziyyat mein tha salar ki us ne

soti hui shahzadi ka sar kaT diya hai

hum donon ne aapas mein koi baat nahin ki

sharmate hue sara safar kaT diya hai

ab is se ziyaada to tujhe kuchh nahin kahna

kafi hai ki hum ne tera par kaT diya hai

taswir mein bhaTka hua ek shaKHs bana kar

har raste ko ta-hadd-e-nazar kaT diya hai

diwar pe likkha hua sab kaT diya tha

sab kaTa hua bar-e-digar kaT diya hai

ye kaTe hue peD faqat chhanw nahin the

logon ne mera sara hunar kaT diya hai