sochiye gar use har nafas maut hai kuchh mudawa bhi ho be-hisi ke liye

sochiye gar use har nafas maut hai kuchh mudāvā bhī ho be-hisī ke liye

sūrajoñ kī virāsat milī thī hameñ dar-ba-dar ho ga.e raushnī ke liye

koī āvāz hai vo koī saaz hai us se hī rañg-o-nik.hat kā dar baaz hai

jis taraf ho nazar vo rahe jalva-gar kaise socheñge ham phir kisī ke liye

bad-dimāġhī mirī hai vahī jo ki thī tarz-e-ḳhud-bīñ tumhārā vo hai jo ki thā

chal rahe haiñ anā ke sahāre magar rāsta hī nahīñ vāpsī ke liye

ho salāmat mirā ishq josh-e-junūñ husn ke raaz ḳhud munkashif ho ga.e

itnī mushkil nahīñ rahguzār-e-fanā be-ḳhudī chāhiye āgāhī ke liye

is zamāne se koī tavaqqo na rakh kis meñ himmat hai ḳhanjar pe rakh de zabāñ

adl-gāhoñ meñ insāf bikne lagā sach bhī kahnā hai jurm aadmī ke liye

tum se ik ghūñT kī pyaas kyā bujh sakī jab ki vābastagī to samundar se thī

ham ne dariyāoñ tak kā safar tai kiyā apne be-ma.anī sī tishnagī ke liye

aadmī kī havas kā Thikānā nahīñ lekin 'anjum' ḳhudā se yahī māñgnā

ik vafādār biivī ho bachche hoñ ghar aur kyā chāhiye zindagī ke liye

sochiye gar use har nafas maut hai kuchh mudawa bhi ho be-hisi ke liye

surajon ki wirasat mili thi hamein dar-ba-dar ho gae raushni ke liye

koi aawaz hai wo koi saz hai us se hi rang-o-nikhat ka dar baz hai

jis taraf ho nazar wo rahe jalwa-gar kaise sochenge hum phir kisi ke liye

bad-dimaghi meri hai wahi jo ki thi tarz-e-KHud-bin tumhaara wo hai jo ki tha

chal rahe hain ana ke sahaare magar rasta hi nahin wapsi ke liye

ho salamat mera ishq josh-e-junun husn ke raaz KHud munkashif ho gae

itni mushkil nahin rahguzar-e-fana be-KHudi chahiye aagahi ke liye

is zamane se koi tawaqqo na rakh kis mein himmat hai KHanjar pe rakh de zaban

adl-gahon mein insaf bikne laga sach bhi kahna hai jurm aadmi ke liye

tum se ek ghunT ki pyas kya bujh saki jab ki wabastagi to samundar se thi

hum ne dariyaon tak ka safar tai kiya apne be-mani si tishnagi ke liye

aadmi ki hawas ka Thikana nahin lekin 'anjum' KHuda se yahi mangna

ek wafadar biwi ho bachche hon ghar aur kya chahiye zindagi ke liye