sochiye humse taghaful bhi baja hai ki nahin

sochiye ham se taġhāful bhī bajā hai ki nahīñ

ki yahī maqsad-e-arbāb-e-fanā hai ki nahīñ

ziist meñ lamha-e-andoh-jafā hai ki nahīñ

ai mohabbat koī terī bhī ḳhatā hai ki nahīñ

past kar dete haiñ maujoñ ko ubharne vaale

Dūbnā ḳhud na ubharne kī sazā hai ki nahīñ

chhāñv meñ phūloñ kī āñkheñ to michī jaatī haiñ

kaun dekhe ye chaman jaag chukā hai ki nahīñ

haañ mire ishq ne soche the baḌe hañgāme

tū ne chhup chhup ke sahārā bhī diyā hai ki nahīñ

kyā ġhalat ishq ko hai jurm-e-vafā kā iqrār

husn par zahmat-e-bedād-o-jafā hai ki nahīñ

tujh ko bedārī-e-gulshan kī qasam hai ki bahār

zehn-e-insāñ bhī kahīñ jaag rahā hai ki nahīñ

sab haiñ shāhid ke bhulāne kā bahāna kar ke

maiñ ne har vaqt tirā naam liyā hai ki nahīñ

kis ko jiine se hai fursat jo ye soche ki mujhe

koī kaam aur bhī jiine ke sivā hai ki nahīñ

shukriya aap ke ehsās-e-jafā kā lekin

ye karam fitna-e-āġhāz-e-jafā hai ki nahīñ

hai abhī faisla baaqī ki diloñ par ab tak

aap se koī sitam ho bhī sakā hai ki nahīñ

raaz phūloñ pe bahāroñ kā karam hai lekin

yuuñ bhī kaliyoñ kā jigar chaak huā hai ki nahīñ

sochiye hum se taghaful bhi baja hai ki nahin

ki yahi maqsad-e-arbab-e-fana hai ki nahin

zist mein lamha-e-andoh-jafa hai ki nahin

ai mohabbat koi teri bhi KHata hai ki nahin

past kar dete hain maujon ko ubharne wale

Dubna KHud na ubharne ki saza hai ki nahin

chhanw mein phulon ki aankhen to michi jati hain

kaun dekhe ye chaman jag chuka hai ki nahin

han mere ishq ne soche the baDe hangame

tu ne chhup chhup ke sahaara bhi diya hai ki nahin

kya ghalat ishq ko hai jurm-e-wafa ka iqrar

husn par zahmat-e-bedad-o-jafa hai ki nahin

tujh ko bedari-e-gulshan ki qasam hai ki bahaar

zehn-e-insan bhi kahin jag raha hai ki nahin

sab hain shahid ke bhulane ka bahana kar ke

main ne har waqt tera nam liya hai ki nahin

kis ko jine se hai fursat jo ye soche ki mujhe

koi kaam aur bhi jine ke siwa hai ki nahin

shukriya aap ke ehsas-e-jafa ka lekin

ye karam fitna-e-aghaz-e-jafa hai ki nahin

hai abhi faisla baqi ki dilon par ab tak

aap se koi sitam ho bhi saka hai ki nahin

raaz phulon pe bahaaron ka karam hai lekin

yun bhi kaliyon ka jigar chaak hua hai ki nahin