socho to qayamat hai chhalawa hai bala hai

socho to qayāmat hai chhalāvā hai balā hai

dekho to faqat raah meñ naqsh-e-kaf-e-pā hai

maanā ki tire haq se tujhe kam hī milā hai

ye bhī kabhī sochā hai ki kyā tū ne diyā hai

maiñ qāfila-e-vaqt ke hamrāh chalūñ kyā

jo shaḳhs hai pīchhe kī taraf dekh rahā hai

auroñ ke taqābul meñ sadā past rahā huuñ

ye bhī mirī nā-karda-gunāhī kī sazā hai

ab apne hī maazī pe yaqīñ aa nahīñ paatā

lagtā hai ye qissa bhī kabhī maiñ ne sunā hai

duniyā ko jo chhoḌā thā to kuchh aur thā aalam

duniyā ko jo chāhā to ajab haal huā hai

is daur ko kyā sa.ī-e-hidāyat kī zarūrat

jis daur kā jo shaḳhs hai farzāna banā hai

ye bhī mirī qismat ki ulajh baiThā maiñ in meñ

kuchh aise amal jin kī sazā hai na jazā hai

us ġham ko bhalā kyoñ na maiñ siine se lagā.ūñ

vo ġham jo mire dost tirā husn-e-atā hai

mumkin ho to mil jaao kisī haal meñ ik baar

ab vaqt kā sūraj hai ki jo Duub rahā hai

'qādir' ko shikāyat nahīñ ġhairoñ kī ravish se

'qādir' ko to apnoñ hī ne māyūs kiyā hai

socho to qayamat hai chhalawa hai bala hai

dekho to faqat rah mein naqsh-e-kaf-e-pa hai

mana ki tere haq se tujhe kam hi mila hai

ye bhi kabhi socha hai ki kya tu ne diya hai

main qafila-e-waqt ke hamrah chalun kya

jo shaKHs hai pichhe ki taraf dekh raha hai

auron ke taqabul mein sada past raha hun

ye bhi meri na-karda-gunahi ki saza hai

ab apne hi mazi pe yaqin aa nahin pata

lagta hai ye qissa bhi kabhi main ne suna hai

duniya ko jo chhoDa tha to kuchh aur tha aalam

duniya ko jo chaha to ajab haal hua hai

is daur ko kya sai-e-hidayat ki zarurat

jis daur ka jo shaKHs hai farzana bana hai

ye bhi meri qismat ki ulajh baiTha main in mein

kuchh aise amal jin ki saza hai na jaza hai

us gham ko bhala kyon na main sine se lagaun

wo gham jo mere dost tera husn-e-ata hai

mumkin ho to mil jao kisi haal mein ek bar

ab waqt ka suraj hai ki jo Dub raha hai

'qadir' ko shikayat nahin ghairon ki rawish se

'qadir' ko to apnon hi ne mayus kiya hai