sochon mein lahu uchhaalte hain

sochoñ meñ lahū uchhālte haiñ

ham apnī tahoñ meñ jhāñkte haiñ

duniyā kī hazār nematoñ meñ

ham ek tujhī ko jānte haiñ

āñkhoñ se dukhoñ ke rañg āḳhir

sāras kī uḌaan uḌ ga.e haiñ

sāvan kī tarah hameñ bhigo kar

bādal kī tarah guzar ga.e haiñ

yuuñ bhī hai ki pyaar ke nashe meñ

kuchh soch ke log ro paḌe haiñ

vo dukh to ḳhushī ke baab meñ the

ye dukh jo tulū ho rahe haiñ

jo kuchh bhī hai dil ke aa.ine meñ

sab terī nazar ke zāviye haiñ

bahte hue do badan samundar

hoñToñ ke kināre aa mile haiñ

kuchh bhī to nahīñ hai paas 'ḳhāvar'

bas ek anā hai rat-jage haiñ

sochon mein lahu uchhaalte hain

hum apni tahon mein jhankte hain

duniya ki hazar nematon mein

hum ek tujhi ko jaante hain

aankhon se dukhon ke rang aaKHir

saras ki uDan uD gae hain

sawan ki tarah hamein bhigo kar

baadal ki tarah guzar gae hain

yun bhi hai ki pyar ke nashe mein

kuchh soch ke log ro paDe hain

wo dukh to KHushi ke bab mein the

ye dukh jo tulu ho rahe hain

jo kuchh bhi hai dil ke aaine mein

sab teri nazar ke zawiye hain

bahte hue do badan samundar

honTon ke kinare aa mile hain

kuchh bhi to nahin hai pas 'KHawar'

bas ek ana hai rat-jage hain