sochta hai kis liye tu mere yar de mujhe

sochtā hai kis liye tū mere yaar de mujhe

thak chukā huuñ nafratoñ se thoḌā pyaar de mujhe

kaun huuñ mujhe to apnā naam bhī patā nahīñ

koī merā naam le ke phir pukār de mujhe

in ḳhirad kī hīla-sāziyoñ se tū amaan de

daftar-e-junūñ meñ koī kārobār de mujhe

aaj apne hī muqāble pe DaT gayā huuñ maiñ

teġh koī bhej koī rāhvār de mujhe

is anā kī jañg meñ tū fat.h-yāb kar mujhe

ye sharaf bhī aaj mere shahsavār de mujhe

kuchh ḳhabar to de mire musāfiroñ kī a sabā

kuchh nishān-e-kūcha-hā-e-be-dayār de mujhe

TuuT kar bikhartā jā rahā huuñ is tarah se maiñ

kaash koī haath baḌh ke phir sañvār de mujhe

'shāhid'-e-navā-e-asr ke suḳhan kī qadr kar

lahja-e-sukūt harf-e-e'tibār de mujhe

sochta hai kis liye tu mere yar de mujhe

thak chuka hun nafraton se thoDa pyar de mujhe

kaun hun mujhe to apna nam bhi pata nahin

koi mera nam le ke phir pukar de mujhe

in KHirad ki hila-saziyon se tu aman de

daftar-e-junun mein koi karobar de mujhe

aaj apne hi muqable pe DaT gaya hun main

tegh koi bhej koi rahwar de mujhe

is ana ki jang mein tu fath-yab kar mujhe

ye sharaf bhi aaj mere shahsawar de mujhe

kuchh KHabar to de mere musafiron ki a saba

kuchh nishan-e-kucha-ha-e-be-dayar de mujhe

TuT kar bikharta ja raha hun is tarah se main

kash koi hath baDh ke phir sanwar de mujhe

'shahid'-e-nawa-e-asr ke suKHan ki qadr kar

lahja-e-sukut harf-e-e'tibar de mujhe