sochta hun khaDa kinare par

sochtā huuñ khaḌā kināre par

chāñd par jā.ūñ yā sitāre par

mujh se aage nikal ga.e mire log

mujh ko ruknā paḌā ishāre par

ai bhañvar sirf ye ḳhayāl rahe

ek naav hai tere dhāre par

ham ne tūfāñ kā rāsta rokā

kaaT Daale ga.e hamāre par

bhuuk hai bhiik se nahīñ miTegī

māthā Teko na us duvāre par

ḳhasta dīvār terī umr darāz

maiñ chalā thā tire sahāre par

ik mohabbat pe ik mohabbat kī

ik ḳhasāra kiyā ḳhasāre par

naqd-e-jāñ jaisī besh-qīmat shai

ham luTāte rahe udhāre par

ek jhoñkā havā kā aa niklā

ham ne zulfoñ ke bal sañvāre par

kaisī bastī basā.ī hai tum ne

koī suntā nahīñ pukāre par

koī tasvīr ban nahīñ paa.ī

ham ne kāġhaz pe rang utāre par

bol saktā hai sun nahīñ saktā

ḳhaak ho aise miTTī-gāre par

ai ḳhudā kitnā be-niyāz hai tū

aadmī tujh pe jaan vaare par

aise sach pe hazār tohmat ho

jis ne gardan kaTā.ī aare par

sochta hun khaDa kinare par

chand par jaun ya sitare par

mujh se aage nikal gae mere log

mujh ko rukna paDa ishaare par

ai bhanwar sirf ye KHayal rahe

ek naw hai tere dhaare par

hum ne tufan ka rasta roka

kaT Dale gae hamare par

bhuk hai bhik se nahin miTegi

matha Teko na us duware par

KHasta diwar teri umr daraaz

main chala tha tere sahaare par

ek mohabbat pe ek mohabbat ki

ek KHasara kiya KHasare par

naqd-e-jaan jaisi besh-qimat shai

hum luTate rahe udhaare par

ek jhonka hawa ka aa nikla

hum ne zulfon ke bal sanware par

kaisi basti basai hai tum ne

koi sunta nahin pukare par

koi taswir ban nahin pai

hum ne kaghaz pe rang utare par

bol sakta hai sun nahin sakta

KHak ho aise miTTi-gare par

ai KHuda kitna be-niyaz hai tu

aadmi tujh pe jaan ware par

aise sach pe hazar tohmat ho

jis ne gardan kaTai aare par