sochti hun mujhko har dam aazmata kaun hai

sochtī huuñ mujh ko har dam āzmātā kaun hai

muskurātī huuñ maiñ jab to dil dukhātā kaun hai

ajnabī sī ik sadā aatī hai aadhī raat ko

jab maiñ so jaatī huuñ to mujh ko jagātā kaun hai

amn ke na.are lagāte haiñ sabhī din meñ magar

raat ke pichhle pahar ghar ko jalātā kaun hai

maiñ kahānī likhne kī mushtāq rahtī huuñ magar

sher kahne kā hunar mujh ko sikhātā kaun hai

maañ manātī thī mujhe aksar baḌe hī pyaar se

ab agar maiñ rūThtī huuñ to manātā kaun hai

hañste hañste zālimoñ ne ghar ko vīrāñ kar diyā

dekhnā hai ujḌe ghar ko ab basātā kaun hai

maiñ ġhazal pyārī ġhazal kahtī hai ye mujh se ġhazal

mujh ko 'tal.at' achchhī dhun meñ gungunātā kaun hai

sochti hun mujh ko har dam aazmata kaun hai

muskuraati hun main jab to dil dukhata kaun hai

ajnabi si ek sada aati hai aadhi raat ko

jab main so jati hun to mujh ko jagata kaun hai

amn ke nare lagate hain sabhi din mein magar

raat ke pichhle pahar ghar ko jalata kaun hai

main kahani likhne ki mushtaq rahti hun magar

sher kahne ka hunar mujh ko sikhata kaun hai

man manati thi mujhe aksar baDe hi pyar se

ab agar main ruThti hun to manata kaun hai

hanste hanste zalimon ne ghar ko viran kar diya

dekhna hai ujDe ghar ko ab basata kaun hai

main ghazal pyari ghazal kahti hai ye mujh se ghazal

mujh ko 'talat' achchhi dhun mein gungunata kaun hai