soe pani ke tale Dube hue paikar likhen

so.e paanī ke tale Duube hue paikar likheñ

ā.īna-ḳhāne meñ guzrī sā.atoñ ke ghar likheñ

aañkh kī putlī meñ Thahrī ḳhvāhishoñ ke rañg se

jo na ho mahsūs aisī baat chehre par likheñ

dastakeñ detī hai kachche jism par mauj-e-sabā

vaqt ke āb-e-ravāñ pe aks ke paikar likheñ

bhīge hoñToñ par havā ke garm bose sabt haiñ

sard kamre meñ lahū ke dauḌte lashkar likheñ

ḳhvāhishoñ ke chāñd kā lambā safar tai ho gayā

ab akele-pan ke maidāñ meñ ghire mandar likheñ

muTThiyāñ kholīñ pasīne ke sivā kuchh bhī nahīñ

umr se baḌh kar purānī baat phir kyūñ-kar likheñ

jism ke qisse to ab 'ahmad' purāne ho ga.e

ab koī taaza rivāyat dil ke patthar par likheñ

soe pani ke tale Dube hue paikar likhen

aaina-KHane mein guzri saaton ke ghar likhen

aankh ki putli mein Thahri KHwahishon ke rang se

jo na ho mahsus aisi baat chehre par likhen

dastaken deti hai kachche jism par mauj-e-saba

waqt ke aab-e-rawan pe aks ke paikar likhen

bhige honTon par hawa ke garm bose sabt hain

sard kamre mein lahu ke dauDte lashkar likhen

KHwahishon ke chand ka lamba safar tai ho gaya

ab akele-pan ke maidan mein ghire mandar likhen

muTThiyan kholin pasine ke siwa kuchh bhi nahin

umr se baDh kar purani baat phir kyun-kar likhen

jism ke qisse to ab 'ahmad' purane ho gae

ab koi taza riwayat dil ke patthar par likhen