soi hasrat ko jagane aa gae

soī hasrat ko jagāne aa ga.e

ḳhvāb phir mujh ko rijhāne aa ga.e

sādgī chehre pe apne oḌh kar

mujh se vo mujh ko churāne aa ga.e

tapte sahrā meñ the jo jhulsā diye

ḳhat purāne kyoñ bulāne aa ga.e

qissa-dar-qissa sadā chalte rahe

paañv meñ chhāloñ ke daane aa ga.e

zindagī jhūTe haiñ sab va.ade tere

sabr-o-himmat ko miTāne aa ga.e

ranj aur ḳhushiyoñ ke sab mele hameñ

'sārthī' jiinā sikhāne aa ga.e

soi hasrat ko jagane aa gae

KHwab phir mujh ko rijhane aa gae

sadgi chehre pe apne oDh kar

mujh se wo mujh ko churane aa gae

tapte sahra mein the jo jhulsa diye

KHat purane kyon bulane aa gae

qissa-dar-qissa sada chalte rahe

panw mein chhaalon ke dane aa gae

zindagi jhuTe hain sab wade tere

sabr-o-himmat ko miTane aa gae

ranj aur KHushiyon ke sab mele hamein

'sarthi' jina sikhane aa gae