sote hain phail phail ke sare palang par

sote haiñ phail phail ke saare palañg par

ham chup alag paḌe haiñ kināre palañg par

afshāñ ke zarre dekh ke saare palañg par

samjhā maiñ loTte haiñ sitāre palañg par

pūchho na mujh se shiddat-e-dard-e-shab-e-firāq

taḌpā kiyā maiñ raat ko saare palañg par

lipTe hue paḌe rahe paTTī se ham alag

soyā kiye vo chain se saare palañg par

bechain ho ke farsh pe lag jā.egī jo aañkh

chaliye ḳhudā ke vāste pyāre palañg par

us mah baġhair niiñd na aa.ī tamām raat

leTe hue ginā kiye taare palañg par

toshak ke phuul ban ga.e añgāre hijr meñ

dahkā kī ek aag sī saare palañg par

qismat hai aage vasl mayassar ho yā na ho

aa.e to minnatoñ se vo baare palañg par

īzā.eñ sub.h-e-hijr kī kahne bhī ham na paa.e

vo shaam hī se aaj sidhāre palañg par

bāhar huā maiñ jaame se apne shab-e-visāl

kapḌe jo us ne apne utāre palañg par

us māh-rū kī diid kā allāh re ishtiyāq

gardūñ se TuuTe paḌte haiñ taare palañg par

shab ko ḳhajil thī us kī safedī se chāñdnī

chādar kasī thī aisī tumhāre palañg par

furqat kī raat ro ro ke dariyā bahā diye

takiye bane nahañg hamāre palañg par

paTTī ke nīche baiThā rahā rāt-bhar 'qalaq'

rakkhā qadam na ḳhauf ke maare palañg par

sote hain phail phail ke sare palang par

hum chup alag paDe hain kinare palang par

afshan ke zarre dekh ke sare palang par

samjha main loTte hain sitare palang par

puchho na mujh se shiddat-e-dard-e-shab-e-firaq

taDpa kiya main raat ko sare palang par

lipTe hue paDe rahe paTTi se hum alag

soya kiye wo chain se sare palang par

bechain ho ke farsh pe lag jaegi jo aankh

chaliye KHuda ke waste pyare palang par

us mah baghair nind na aai tamam raat

leTe hue gina kiye tare palang par

toshak ke phul ban gae angare hijr mein

dahka ki ek aag si sare palang par

qismat hai aage wasl mayassar ho ya na ho

aae to minnaton se wo bare palang par

izaen subh-e-hijr ki kahne bhi hum na pae

wo sham hi se aaj sidhaare palang par

bahar hua main jame se apne shab-e-visal

kapDe jo us ne apne utare palang par

us mah-ru ki did ka allah re ishtiyaq

gardun se TuTe paDte hain tare palang par

shab ko KHajil thi us ki safedi se chandni

chadar kasi thi aisi tumhaare palang par

furqat ki raat ro ro ke dariya baha diye

takiye bane nahang hamare palang par

paTTi ke niche baiTha raha raat-bhar 'qalaq'

rakkha qadam na KHauf ke mare palang par