soz-e-darun se raaz-e-mohabbat ayan na ho

soz-e-darūñ se rāz-e-mohabbat ayaañ na ho

dil sham.a ban ke jal uThe lekin dhuāñ na ho

hāsil sukūn-e-dil na ho taskīn-e-jāñ na ho

jab tak ġham-e-hayāt ġham-e-jāvedāñ na ho

ye kyā kahā ki ātish-e-gul kā dhuāñ na ho

barq-e-tapāñ se pūchh mirā āshiyāñ na ho

duniyā kī mahfiloñ meñ ho zikr-e-ajal zarūr

afsāna-e-hayāt kisī kā bayāñ na ho

karte haiñ kyoñ salām ye dair-o-haram mujhe

merī jabīñ meñ jazb tirā āstāñ na ho

ye ishtihār kar diye chaspāñ qadam qadam

manzil kī samt koī ravāñ kārvāñ na ho

maiñ phir gayā huuñ apne hī dil se ḳhudā kare

merī tarah jahāñ meñ koī bad-gumāñ na ho

achchhā yahī batā mujhe ai fitrat-e-chaman

kāñToñ ke paas phuul kahāñ ho kahāñ na ho

rotī hai ro.e jaltī hai shab bhar jalā kare

lekin zabān-e-sham.a mirī ham-zabāñ na ho

le chal vahāñ jahāñ mujhe ai be-ḳhudī-e-shauq

is ālam-e-vajūd kā vahm-o-gumāñ na ho

rang-e-bahār bazm-e-suḳhan par nisār hai

dekho kahīñ vo 'ahsan'-e-rangīñ-bayāñ na ho

soz-e-darun se raaz-e-mohabbat ayan na ho

dil shama ban ke jal uThe lekin dhuan na ho

hasil sukun-e-dil na ho taskin-e-jaan na ho

jab tak gham-e-hayat gham-e-jawedan na ho

ye kya kaha ki aatish-e-gul ka dhuan na ho

barq-e-tapan se puchh mera aashiyan na ho

duniya ki mahfilon mein ho zikr-e-ajal zarur

afsana-e-hayat kisi ka bayan na ho

karte hain kyon salam ye dair-o-haram mujhe

meri jabin mein jazb tera aastan na ho

ye ishtihaar kar diye chaspan qadam qadam

manzil ki samt koi rawan karwan na ho

main phir gaya hun apne hi dil se KHuda kare

meri tarah jahan mein koi bad-guman na ho

achchha yahi bata mujhe ai fitrat-e-chaman

kanTon ke pas phul kahan ho kahan na ho

roti hai roe jalti hai shab bhar jala kare

lekin zaban-e-shama meri ham-zaban na ho

le chal wahan jahan mujhe ai be-KHudi-e-shauq

is aalam-e-wajud ka wahm-o-guman na ho

rang-e-bahaar bazm-e-suKHan par nisar hai

dekho kahin wo 'ahsan'-e-rangin-bayan na ho