soz-e-dil baDhne na pae aankh tak ai zabt-e-gham

soz-e-dil baḌhne na paa.e aañkh tak ai zabt-e-ġham

aag bhaḌkā degā ye is ḳhāna-e-ḳhas-posh meñ

chupke chupke maiñ piye jaatā huuñ ulfat meñ sarishk

haiñ balā kī garmiyāñ is ātish-e-ḳhāmosh meñ

ranj-o-rāhat ek se haiñ mujh ko misl-e-ḳhār-o-gul

mādar-e-gītī ne paalā un ko ik āġhosh meñ

āqibat-bar-pusht ye hai āqibat-bardosh vo

farq ye hai ek mun.im ek ḳhirqa-posh meñ

saḳhtiyoñ meñ parvarish paate haiñ ahl-e-rang-o-bū

gul palā karte haiñ aksar ḳhaar kī āġhosh meñ

ai karīm 'aiman' ke isyāñ aaj kar is ke sipurd

terā dariyā-e-karam lahrā rahā hai josh meñ

soz-e-dil baDhne na pae aankh tak ai zabt-e-gham

aag bhaDka dega ye is KHana-e-KHas-posh mein

chupke chupke main piye jata hun ulfat mein sarishk

hain bala ki garmiyan is aatish-e-KHamosh mein

ranj-o-rahat ek se hain mujh ko misl-e-KHar-o-gul

madar-e-giti ne pala un ko ek aaghosh mein

aaqibat-bar-pusht ye hai aaqibat-bardosh wo

farq ye hai ek munim ek KHirqa-posh mein

saKHtiyon mein parwarish pate hain ahl-e-rang-o-bu

gul pala karte hain aksar KHar ki aaghosh mein

ai karim 'aiman' ke isyan aaj kar is ke sipurd

tera dariya-e-karam lahra raha hai josh mein