soz-e-gham ranj-o-alam had se siwa dete hain

soz-e-ġham ranj-o-alam had se sivā dete haiñ

vo bhī kyā ḳhuub mohabbat kā sila dete haiñ

ishq kī raah meñ marte nahīñ marne vaale

ishq ko zinda-e-jāved banā dete haiñ

kis tarah jaan se jaate haiñ marīzān-e-alam

aa.iye aaj ye manzar bhī dikhā dete haiñ

kyā guzartī hai kisī par unheñ ye kyā ma.alūm

vo to parda ruḳh-e-raushan se uThā dete haiñ

tum 'ziyā' kis ko sunāte ho fasāna dil kā

vo to har baat kā afsāna banā dete haiñ

soz-e-gham ranj-o-alam had se siwa dete hain

wo bhi kya KHub mohabbat ka sila dete hain

ishq ki rah mein marte nahin marne wale

ishq ko zinda-e-jawed bana dete hain

kis tarah jaan se jate hain marizan-e-alam

aaiye aaj ye manzar bhi dikha dete hain

kya guzarti hai kisi par unhen ye kya malum

wo to parda ruKH-e-raushan se uTha dete hain

tum 'ziya' kis ko sunate ho fasana dil ka

wo to har baat ka afsana bana dete hain