soz-e-gham se jal raha hun dekhta koi nahin

soz-e-ġham se jal rahā huuñ dekhtā koī nahīñ

kyā butoñ kā shahr hai ġham-āshnā koī nahīñ

kis ke aage sar jhukā.ūñ devtā koī nahīñ

pattharoñ ke shahr meñ merā ḳhudā koī nahīñ

zulm-o-istibdād kā ik silsila hai us ke saath

ye samajhtā hai vo shāyad ki ḳhudā koī nahīñ

tere dar se uTh ke jaa.eñ to kidhar jaa.eñ batā

jis taraf bhī dekhte haiñ rāsta koī nahīñ

dūriyāñ hotīñ diloñ meñ to miTā lete unheñ

kis liye baḌh kar mileñ ki fāsla koī nahīñ

husn hai maġhrūr par apnī anā ko kyā huā

kis ko itnā vaqt hai ye sochtā koī nahīñ

zaḳhm-hā-e-dil dikhā kar kyā milā 'naġhmī' use

jis nazar meñ qīmat-e-jins-e-vafā koī nahīñ

soz-e-gham se jal raha hun dekhta koi nahin

kya buton ka shahr hai gham-ashna koi nahin

kis ke aage sar jhukaun dewta koi nahin

pattharon ke shahr mein mera KHuda koi nahin

zulm-o-istibdad ka ek silsila hai us ke sath

ye samajhta hai wo shayad ki KHuda koi nahin

tere dar se uTh ke jaen to kidhar jaen bata

jis taraf bhi dekhte hain rasta koi nahin

duriyan hotin dilon mein to miTa lete unhen

kis liye baDh kar milen ki fasla koi nahin

husn hai maghrur par apni ana ko kya hua

kis ko itna waqt hai ye sochta koi nahin

zaKHm-ha-e-dil dikha kar kya mila 'naghmi' use

jis nazar mein qimat-e-jins-e-wafa koi nahin