soz-e-junun ne waqt se Darne nahin diya

soz-e-junūñ ne vaqt se Darne nahīñ diyā

āsān rāstoñ se guzarne nahīñ diyā

sāhil pe jā utarnā to lamhoñ kī baat thī

ek be-dilī thī jis ne ubharne nahīñ diyā

gherā kuchh is tarah se ġham-e-rozgār ne

ḳhud apne aap meñ bhī utarne nahīñ diyā

ūñchī haveliyoñ ne bhī kyā zulm Dhaa.e haiñ

sūraj bhī āñganoñ meñ utarne nahīñ diyā

ek soz-e-andarūñ ne har ik moḌ par 'jamīl'

sachchā.iyoñ se ham ko mukarne nahīñ diyā

soz-e-junun ne waqt se Darne nahin diya

aasan raston se guzarne nahin diya

sahil pe ja utarna to lamhon ki baat thi

ek be-dili thi jis ne ubharne nahin diya

ghera kuchh is tarah se gham-e-rozgar ne

KHud apne aap mein bhi utarne nahin diya

unchi haweliyon ne bhi kya zulm Dhae hain

suraj bhi aanganon mein utarne nahin diya

ek soz-e-andarun ne har ek moD par 'jamil'

sachchaiyon se hum ko mukarne nahin diya