subh aai bhi to kuhron mein izafa ho gaya

sub.h aa.ī bhī to kuhroñ meñ izāfa ho gayā

niiñd kyā TuuTī ki ḳhvāboñ meñ izāfa ho gayā

be-zamīrī ke izāfoñ meñ izāfa ho gayā

yā'nī chaltī-phirtī lāshoñ meñ izāfa ho gayā

ho chukā hai jaise dar-parda qayāmat kā nuzūl

zindagānī ke 'azāboñ meñ izāfa ho gayā

ghar se ghabrā kar zamāna aa gayā maidān meñ

ham ne ye samjhā ki meloñ meñ izāfa ho gayā

kal yahāñ amrūd kā ik baaġh thā vo kyā huā

ab yahāñ kyūñkar babūloñ meñ izāfa ho gayā

dard se fursat milī to aa.ine chubhne lage

zaḳhm bhar jaane se dāġhoñ meñ izāfa ho gayā

khet kī miTTī vahī hai abr-e-bārāñ bhī vahī

kī ga.ī mehnat to fasloñ meñ izāfa ho gayā

nāchne gaane lage mazdūr har dukh bhuul kar

ujratoñ ke chand sikkoñ meñ izāfa ho gayā

kyoñ na ho bārish meñ apnī ḳhush-libāsī dāġh-dār

gāḌiyoñ ke saath chhīñToñ meñ izāfa ho gayā

peḌ suunā ho gayā kuchh der kī ḳhātir to kyā

kaT ga.iiñ shāḳheñ to shāḳhoñ meñ izāfa ho gayā

kyā karūñ 'irfān' kā'be kā maiñ ab ulTā tavāf

vajd kī hālat meñ pheroñ meñ izāfa ho gayā

subh aai bhi to kuhron mein izafa ho gaya

nind kya TuTi ki KHwabon mein izafa ho gaya

be-zamiri ke izafon mein izafa ho gaya

ya'ni chalti-phirti lashon mein izafa ho gaya

ho chuka hai jaise dar-parda qayamat ka nuzul

zindagani ke 'azabon mein izafa ho gaya

ghar se ghabra kar zamana aa gaya maidan mein

hum ne ye samjha ki melon mein izafa ho gaya

kal yahan amrud ka ek bagh tha wo kya hua

ab yahan kyunkar babulon mein izafa ho gaya

dard se fursat mili to aaine chubhne lage

zaKHm bhar jaane se daghon mein izafa ho gaya

khet ki miTTi wahi hai abr-e-baran bhi wahi

ki gai mehnat to faslon mein izafa ho gaya

nachne gane lage mazdur har dukh bhul kar

ujraton ke chand sikkon mein izafa ho gaya

kyon na ho barish mein apni KHush-libasi dagh-dar

gaDiyon ke sath chhinTon mein izafa ho gaya

peD suna ho gaya kuchh der ki KHatir to kya

kaT gain shaKHen to shaKHon mein izafa ho gaya

kya karun 'irfan' ka'be ka main ab ulTa tawaf

wajd ki haalat mein pheron mein izafa ho gaya