subh-dam aaya to kya hangam-e-sham aaya to kya

sub.h-dam aayā to kyā hañgām-e-shām aayā to kyā

tū mirī nākāmiyoñ ke ba.ad kaam aayā to kyā

iltifāt-e-avvalīñ kī baat hī kuchh aur hai

mujh tak un kī bazm meñ ab daur-e-jām aayā to kyā

tāqat-e-nazzāra jab minnat-pazīr-e-hosh ho

bahr-jalva phir koī bālā-e-bām aayā to kyā

shorish-e-hañgāma-e-mansūr kī tajdīd hai

qatl ko mere vo bā.īñ ehtimām aayā to kyā

ab kahāñ vo fasl-e-gul aur ab kahāñ josh-e-bahār

bahr-e-gul-gasht-e-chaman vo ḳhush-ḳhirām aayā to kyā

ai hujūm-e-nā-murādī ai vufūr-e-yās-o-ġham

ishq meñ kuchh lutf-e-sa.ī-e-nā-tamām aayā to kyā

jab garebāñ meñ hamāre taar tak baaqī nahīñ

phir agar sub.h-e-bahārāñ kā payām aayā to kyā

ārzū-e-dil abhī tak tishna-e-tafsīr hai

tujh ko 'najmī' shiva-e-husn-e-kalām aayā to kyā

subh-dam aaya to kya hangam-e-sham aaya to kya

tu meri nakaamiyon ke baad kaam aaya to kya

iltifat-e-awwalin ki baat hi kuchh aur hai

mujh tak un ki bazm mein ab daur-e-jam aaya to kya

taqat-e-nazzara jab minnat-pazir-e-hosh ho

bahr-jalwa phir koi baala-e-baam aaya to kya

shorish-e-hangama-e-mansur ki tajdid hai

qatl ko mere wo bain ehtimam aaya to kya

ab kahan wo fasl-e-gul aur ab kahan josh-e-bahaar

bahr-e-gul-gasht-e-chaman wo KHush-KHiram aaya to kya

ai hujum-e-na-muradi ai wufur-e-yas-o-gham

ishq mein kuchh lutf-e-sai-e-na-tamam aaya to kya

jab gareban mein hamare tar tak baqi nahin

phir agar subh-e-bahaaran ka payam aaya to kya

aarzu-e-dil abhi tak tishna-e-tafsir hai

tujh ko 'najmi' shiwa-e-husn-e-kalam aaya to kya