subh-e-ishrat zindagi ki sham ho kar rah gai

sub.h-e-ishrat zindagī kī shaam ho kar rah ga.ī

hasrat-e-dil maut kā paiġhām ho kar rah ga.ī

tum ne duniyā ko luTā deñ ne.amateñ achchhā kiyā

merī duniyā bas tumhārā naam ho kar rah ga.ī

jis sahar kī ham ne māñgī thī asīrī meñ duā

vo sahar aa.ī to lekin shaam ho kar rah ga.ī

ai mohabbat ke ḳhudā ai ishq ke parvardigār

har tamannā ab ḳhayāl-e-ḳhām ho kar rah ga.ī

ḳhauf-e-rusvā.ī ne mujh ko aah bhī bharne na dī

lab tak aa.ī bhī to un kā naam ho kar rah ga.ī

dekh kar un ko mirī āñkhoñ meñ bhar aa.e the ashk

baat hī kyā thī magar vo aam ho kar rah ga.ī

ahl-e-mahfil dekhte hī 'saif' be-ḳhud ho ga.e

har adā saaqī kī sharh-e-jām ho kar rah ga.ī

subh-e-ishrat zindagi ki sham ho kar rah gai

hasrat-e-dil maut ka paigham ho kar rah gai

tum ne duniya ko luTa den neamaten achchha kiya

meri duniya bas tumhaara nam ho kar rah gai

jis sahar ki hum ne mangi thi asiri mein dua

wo sahar aai to lekin sham ho kar rah gai

ai mohabbat ke KHuda ai ishq ke parwardigar

har tamanna ab KHayal-e-KHam ho kar rah gai

KHauf-e-ruswai ne mujh ko aah bhi bharne na di

lab tak aai bhi to un ka nam ho kar rah gai

dekh kar un ko meri aankhon mein bhar aae the ashk

baat hi kya thi magar wo aam ho kar rah gai

ahl-e-mahfil dekhte hi 'saif' be-KHud ho gae

har ada saqi ki sharh-e-jam ho kar rah gai