subh-e-nau aa gai tirgi miT gai shor hai har taraf inqalab aa gaya

sub.h-e-nau aa ga.ī tīrgī miT ga.ī shor hai har taraf inqalāb aa gayā

mujh ko Dar hai añdherā koī raat kā muñh pe Daale sahar kī naqāb aa gayā

husn kī ye adā bhī hai kitnī hasīñ ik tabassum meñ sab kuchh hai kuchh bhī nahīñ

apnī apnī samajh apnā apnā yaqīñ har savāl nazar kā javāb aa gayā

bazm-e-hastī meñ hañgāma barpā kiye koī giitā liye koī qur.āñ liye

maiñ bhī saaqī ke hāthoñ se paa.ī thī jo le ke apnī sunahrī kitāb aa gayā

fitrat-e-husn ko kaun samjhe bhalā gah atā hī atā gah jafā hī jafā

gaah taqsīr kī aur hañsī aa ga.ī gaah sajde kiye aur itaab aa gayā

ziist kī talḳhiyāñ al-amāñ phir bhī vo chhīn paa.eñ na mere laboñ se hañsī

ishq tū ne diyā vo ġham-e-shādmāñ ho ke nākām maiñ kāmyāb aa gayā

gardish-e-roz-o-shab ne na jaane kahāñ kī nikālī hai 'mullā' se ye dushmanī

us ne sāġhar uThāyā sahar ho ga.ī us ne sāġhar rakhā māhtāb aa gayā

subh-e-nau aa gai tirgi miT gai shor hai har taraf inqalab aa gaya

mujh ko Dar hai andhera koi raat ka munh pe Dale sahar ki naqab aa gaya

husn ki ye ada bhi hai kitni hasin ek tabassum mein sab kuchh hai kuchh bhi nahin

apni apni samajh apna apna yaqin har sawal nazar ka jawab aa gaya

bazm-e-hasti mein hangama barpa kiye koi gita liye koi quran liye

main bhi saqi ke hathon se pai thi jo le ke apni sunahri kitab aa gaya

fitrat-e-husn ko kaun samjhe bhala gah ata hi ata gah jafa hi jafa

gah taqsir ki aur hansi aa gai gah sajde kiye aur itab aa gaya

zist ki talKHiyan al-aman phir bhi wo chhin paen na mere labon se hansi

ishq tu ne diya wo gham-e-shadman ho ke nakaam main kaamyab aa gaya

gardish-e-roz-o-shab ne na jaane kahan ki nikali hai 'mulla' se ye dushmani

us ne saghar uThaya sahar ho gai us ne saghar rakha mahtab aa gaya