subh-e-nau ka surur hain hum log

sub.h-e-nau kā surūr haiñ ham log

zindagī kā ġhurūr haiñ ham log

raunaq-e-kā.enāt ham se hai

chashm-e-getī kā nuur haiñ ham log

khā ga.e haiñ fareb manzil kā

apnī manzil se duur haiñ ham log

shahr-yār-e-jahān-e-fardā haiñ

aaj bebas zarūr haiñ ham log

phir junūñ le rahā hai añgḌā.ī

phir ġham-e-dil se chuur haiñ ham log

terī duniyā meñ aaj rah kar bhī

terī duniyā se duur haiñ ham log

subh-e-nau ka surur hain hum log

zindagi ka ghurur hain hum log

raunaq-e-kaenat hum se hai

chashm-e-geti ka nur hain hum log

kha gae hain fareb manzil ka

apni manzil se dur hain hum log

shahr-yar-e-jahan-e-farda hain

aaj bebas zarur hain hum log

phir junun le raha hai angDai

phir gham-e-dil se chur hain hum log

teri duniya mein aaj rah kar bhi

teri duniya se dur hain hum log