subh hai raat kahan ab wo kahan raat ki baat

sub.h hai raat kahāñ ab vo kahāñ raat kī baat

baat hī baat to hai baiTh bhī lo baat kī baat

arsh par rahte haiñ kyā ka.abe ke rahne vaale

koī suntā hī nahīñ ahl-e-ḳharābāt kī baat

ye koī baat hai ḳhum saath liye vaa.iz aa.e

aur phir maiñ na sunūñ qibla-e-hājāt kī baat

phuuT kar rote hue dekh liyā hai mujh ko

chheḌne ko mire har-vaqt hai barsāt kī baat

vahī ubhrī hai shikan ban ke jabīñ par terī

gaḌ ga.ī dil meñ tire kyā kisī bad-zāt kī baat

na khulā ye ki kahāñ shab ko bichā.ī thī bisāt

ġhair kī chaal kā kuchh zikr thā kuchh baat kī baat

jab kahā maiñ ne kaho ġhair ke ghar kā kuchh haal

bole jhuñjhlā ke nikālī vahī be-bāt kī baat

kahīñ aisā na ho aa jaa.e taras aap ko kuchh

aap suniye na kisī morid-e-āfāt kī baat

zarf-e-be-mai se pilā.ī to haram meñ phailī

phailtī jald hai kuchh ahl-e-karāmāt kī baat

raat ka.abe meñ ga.ī qulqul-e-mīnā ban kar

na to chhuptī hai na dabtī hai ḳharābāt kī baat

koste haiñ vo burī tarah jo kahtā huuñ 'riyāz'

rāt-bhar aaj bhī hotī rahī kal raat kī baat

subh hai raat kahan ab wo kahan raat ki baat

baat hi baat to hai baiTh bhi lo baat ki baat

arsh par rahte hain kya kabe ke rahne wale

koi sunta hi nahin ahl-e-KHarabaat ki baat

ye koi baat hai KHum sath liye waiz aae

aur phir main na sunun qibla-e-hajat ki baat

phuT kar rote hue dekh liya hai mujh ko

chheDne ko mere har-waqt hai barsat ki baat

wahi ubhri hai shikan ban ke jabin par teri

gaD gai dil mein tere kya kisi bad-zat ki baat

na khula ye ki kahan shab ko bichai thi bisat

ghair ki chaal ka kuchh zikr tha kuchh baat ki baat

jab kaha main ne kaho ghair ke ghar ka kuchh haal

bole jhunjhla ke nikali wahi be-baat ki baat

kahin aisa na ho aa jae taras aap ko kuchh

aap suniye na kisi morid-e-afat ki baat

zarf-e-be-mai se pilai to haram mein phaili

phailti jald hai kuchh ahl-e-karamat ki baat

raat kabe mein gai qulqul-e-mina ban kar

na to chhupti hai na dabti hai KHarabaat ki baat

koste hain wo buri tarah jo kahta hun 'riyaz'

raat-bhar aaj bhi hoti rahi kal raat ki baat