subh hoti hai to phir sham se ji Darta hai

sub.h hotī hai to phir shaam se jī Dartā hai

uf ye āġhāz ki anjām se jī Dartā hai

na alāmat hai na tashḳhīs na chāra jis kā

jaane kis ranjish-e-be-nām se jī Dartā hai

jur.at-e-shauq ko kuchh aise Dasā hai ġham ne

aaj mai-ḳhāne ke har jaam se jī Dartā hai

Dhal gayā ḳhauf-e-ḳhudā husn-e-butāñ meñ shāyad

varna kyoñ sūrat-e-asnām se jī Dartā hai

zulf-bar-dosh ye chehre mujhe ma.azūr rakheñ

dhuup aur chhāñv ke is daam se jī Dartā hai

murtakib jurm-e-mohabbat ke hue kuchh aise

ab na ilzām na dushnām se jī Dartā hai

koī likkhe na pukāre mujhe 'rāhī' kah kar

dosto ab mirā is naam se jī Dartā hai

subh hoti hai to phir sham se ji Darta hai

uf ye aaghaz ki anjam se ji Darta hai

na alamat hai na tashKHis na chaara jis ka

jaane kis ranjish-e-be-nam se ji Darta hai

jurat-e-shauq ko kuchh aise Dasa hai gham ne

aaj mai-KHane ke har jam se ji Darta hai

Dhal gaya KHauf-e-KHuda husn-e-butan mein shayad

warna kyon surat-e-asnam se ji Darta hai

zulf-bar-dosh ye chehre mujhe mazur rakhen

dhup aur chhanw ke is dam se ji Darta hai

murtakib jurm-e-mohabbat ke hue kuchh aise

ab na ilzam na dushnam se ji Darta hai

koi likkhe na pukare mujhe 'rahi' kah kar

dosto ab mera is nam se ji Darta hai