subh ka afsana kah kar sham se

sub.h kā afsāna kah kar shaam se

kheltā huuñ gardish-e-ayyām se

un kī yaad un kī tamannā un kā ġham

kaT rahī hai zindagī ārām se

ishq meñ ā.eñgī vo bhī sā.ateñ

kaam niklegā dil-e-nākām se

laakh maiñ dīvāna-e-rusvā sahī

phir bhī ik nisbat hai tere naam se

sub.h-e-gulshan dekhiye kyā gul khilā.e

kuchh havā badlī huī hai shaam se

haa.e merā mātam-e-tishna-labī

shīsha mil kar ro rahā hai jaam se

be-ḳhudī par shāyad us kā bas nahīñ

josh aa jaatā hai un ke naam se

har-nafas mahsūs hotā hai 'shakīl'

aa rahe haiñ nāma-o-paiġhām se

subh ka afsana kah kar sham se

khelta hun gardish-e-ayyam se

un ki yaad un ki tamanna un ka gham

kaT rahi hai zindagi aaram se

ishq mein aaengi wo bhi saaten

kaam niklega dil-e-nakaam se

lakh main diwana-e-ruswa sahi

phir bhi ek nisbat hai tere nam se

subh-e-gulshan dekhiye kya gul khilae

kuchh hawa badli hui hai sham se

hae mera matam-e-tishna-labi

shisha mil kar ro raha hai jam se

be-KHudi par shayad us ka bas nahin

josh aa jata hai un ke nam se

har-nafas mahsus hota hai 'shakil'

aa rahe hain nama-o-paigham se